Cabugao, Ilocos Sur – Naaramid ti panagdalus iti igid ti baybay ti Barangay Pug-os, Cabugao, Ilocos Sur itay nabiit babaen iti panangidaulo dagiti Opisiales ti Barangay nga idauluan ni Brgy. Captain Arnold “Bambi” V. Yangat agraman dagiti pannakabagi ti amin nga asosasion iti uneg ti barangay.
Imbatad ni MENRO Edgar S. Balangatan a nasapa a napan nagdalus dagiti lumugar nga indauluan dagiti Opisiales ti Barangay-da ken dagiti Opisiales ti Farmers/Fisheries Associations-da.
Kadua ni MENRO Balangatan dagiti Coastal Resources Management Staff iti Environment and Natural Resources Management Office (ENRMO), Vigan City a nagmonitor iti nadakamat a barangay.
Daytoy nga aktibidad ket regular a pagbinbinnuligan nga ipatungpal ti Environment and Natural Resources Management Office, Provincial Office ken ti Gobierno Lokal a makasakup iti nasao a coastal barangay.
Paset daytoy ti agtultuloy a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti regular a pannakamantener iti nadalus a kabaybayan babaen iti agtultuloy a panaglinis dagiti bumarangay ken asosasion iti masakupanda tapno matagiben dagiti rekursos naturales daytoy a barangay. # (Web In-Action)
No comments:
Post a Comment