Cabugao, Ilocos Sur – Nagmiting manen dagiti Barangay Nutrition Scholars (BNS) iti Setiembre 6, 2016 iti Cabugao Cultural and Sports Complex, Brgy. Rizal, Cabugao, Ilocos Sur ket inatendaran ni Mayor Josh Edward S. Cobangbang.
Indauluan ni Mrs. Gloria T. Segui, Presidente, dagiti Barangay Nutrition Scholar (BNS) a nagtataripnong iti Complex ken tinarabay ida ni Ms. Jeanette Garcia, Municipal Nutrition Action Officer kasta metten da Assistant MNAO Danni Rica G. Magdato ken ni Assistant MNAO Lani Saquiton.
Inikkan ni Mayor Josh Edward ti importansia dagiti naidatag a report dagiti BNS pakaseknan iti programa ti Operation Timbang. Inggunamgunamna kadagiti BNS ken MNAOs a kasapulan koma nga umisu dagiti datos a nakalap iti panagpasiarda kadagiti klienteda iti barangay tapno maikkan met iti umisu nga aksion ken intervention iti programa iti panangikkat iti problema ti malnutrision.
Maipalagip nga immun-una a naaramid ti panagmiting dagiti BNS a nagatendaran ni Mayor Josh Edward ken ni ABC President Thaddeus U. Soller ket bininsada ti pateg ti agtultuloy a programa ti Munisipio pakaseknan iti Nutrision kadagiti ubbing nga agtawen iti 0-6 ken iti agtultuloy a pananglapped ti malnutrision kadagiti umili.
Napagnunumuan idi a maaramid ti Re-evaluation kadagiti BNS ket birokenda dagiti mainayon nga ubbing nga agsagsagaba iti malnutrision iti masakupanda ken ammuenda ti kasasaad dagiti nagannak kadagitoy tapno mairamanda a maikkan ida iti pagsapulanda. Iti kasta, naan-anay ti pannakatulongda a mangpaadda iti nasustansia a pagtaraon dagiti ubbing.
Naidarirag pay idi babaen ti ABC President a kasapulan nga agatendar koma ti BNS iti sesion ti Konseho ti Barangay tapno idatagda dagiti pakaseknan ti trabahoda ken maipeksada iti Konseho ti Barangay dagiti dadduma pay a pakaseknanda.
Nagyaman ni Mayor Josh Edward iti amin a nagatendar iti maikadua a miting ti BNS. Kalikagumanna iti agtultuloy a napintas a koordinasion ti amin a maseknan nga Ahensia ken pannakitinnulong dagiti Opisiales ti Barangay tapno masolbar ti parikut iti malnutrision. # (Web In-Action)
No comments:
Post a Comment