Cabugao, Ilocos Sur – Nakasagana latta nga agtignay ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur kasta metten dagiti kameng ti Cabugao Rescue babaen iti panangimaton ni MDRRMC Officer Engr. Nestor B. Somera apaman a namonitorda ti isusungad dagiti nagsasaruno a bagyo a nangapektar ditoy Ilokos kangrunaan iti Gener ken Ferdie babaen iti PAG-ASA Bulletin.
Malaksid iti panagmonitor dagiti Cabugao Rescuers iti National Highway, napanda pay kadagiti calamity prone area (inland ken coastal area) tapno obserbaranda ti epekto no pumigpigsa ti tudo ken angin.
Nupay kasta, maikonsentrar dagiti lugan/heavy equipment ti LGU-Cabugao iti asideg ti Munisipio no umay ti bagyo tapno adda masindadaan a mausarda no adda agpaarayat wenno emerhensia a mapanda aksionan nangruna kadagiti barangay.
Daytoy a panagsagana ket naibasar iti nangato a level ti koordinasion ti MDRRMC kadagiti kabinuligna nga Opisina ken Ahensia ti Gobierno a masakupan pay iti PDRRMC-Ilocos Sur no adda nakaro a tudtudo, layus, uram, aksidente ti lugan ken kanaigna a didigra a mapasamak iti las-ud ti Probinsia.
Dagitoy nga aksion ken inisiatiba ket maigapu latta iti napartak a panangipatungpal ti pagrebbenganda iti MDRRMC-Cabugao nga idauluan ni Mayor Josh Edward S. Cobangbang, MDRRMC Chairperson nga agibagnos iti panawen ti napigsa a tudtudo wenno layus tapno maprotektaran dagiti umili iti epekto ti kalamidad. # (Web Situational Report)
No comments:
Post a Comment