Wednesday, September 14, 2016

ENVIRONMENTAL MANAGEMENT PROGRAM, MAPAPIGSA

Cabugao, locos Sur – Naangay iti  nabiit ti miting dagiti katulongan ti LGU-Cabugao nga agipatpatungpal ti Solid Waste Management Program ti  Munisipio partikular iti Ecology Center (Dumpsite)  a manmaneharen ti Luzon Green Art Technology, Inc. (LGA tech., Inc.) a napagbalin idi agangay a  Green Innovations and Consultancy Services, Inc. (GICSI), kapartner ti Local  Government Unit (LGU)-Cabugao babaen iti Integrated Solid Waste Program Under Public-Private Partnership Scheme a daytoy ti  pakibinnadangan dagiti Personnel ti Munisipio  nga imatonan ni MENRO-Designate Edgar S. Balangatan.

Impakaammo ti MENRO-Designate ti LGU-Cabugao nga iti kangrunaan a matamtaming no kasta nga adda panagtitiponda ket iti maaramid a workshop maipanggep iti formulation  ken update ti Integrated Solid Waste Management  Program tapno napimpintas pay iti implementasion  ti programa iti sumarsaruno a sangapulo a tawen (2016-2026). 

Kanaig daytoy, naisagana a mapagsasaritaan dagiti pakaseknan ti Environmental Development iti naaramid nga Executive and Legislative Agenda (ELA) idiay San Fernando City, La Union ket nadakamat dagiti prioridad nga isyu; Goal (Target/Measures); Objectives; PPAs ken Strategies para iti 2016-2019 ELA ti Munisipalidad ti Cabugao.

Kanaig daytoy, impakaammo ti GICSI a mangyimplimentar iti Privatization of Solid Waste Management para iti Munisipalidad ti Cabugao a naballigi dagiti naiwayatda nga addang a nangpasayaat ti koleksion  ken panagaramidan ti organiko a ganagan babaen iti basura. Dagiti organiko a ganagan a naprobitsar ket nangted ti LGU-Cabugao kadagiti mannalon a nayon nga usarenda kadagiti pagtatalonanda ita a Wet Season 2016 (Hunio-Nobiembre). 

Sakbayna, maar-aramid latta iti information-education ken communication kadagiti service barangays ket ditoy a mapasingkedan latta  ti pagannurotan: “No Segregation, No Collection” Program.

Kanayon itoy iti pannakasanay dagiti mangipatungpal iti trabaho iti panagkolekta ti basura iti inaldaw, naiyusuat ti staff development tapno maingato ti working efficiency dagiti mangiggem iti opisinada, improvement of disposal facility ken on-site organic gardening a nayon nga obra dagiti obrerosda.

Kabayatanna, epektibo met ti Shredder Machine a nainayon a katulongan ti LGA Tech., Inc. iti pannakagiling dagiti biodegradable wastes.

Segun ken ni MENRO Edgar S. Balangatan, AT, a babaen daytoy a ramit ket mapadaras a maproseso dagiti maaramid nga Organiko a Ganagan a pagbalinan dagiti agrupsa a basura.

Kanaig pay daytoy, innayon ni Mr. Balangatan a makatulong ti dakkel dagitoy a maprobitsar a natural nga abuno iti pannakaitandudo ti Organic Agriculture ti Munisipalidad kas panangannurot iti Organic Agriculture Act nga ipatpatungpal dagiti LGU’s agsipud ta dagiti mannalon iti Cabugao iti maisagut kadaytoy a maaramid nga abuno iti Ecology Center. 

Dagitoy nga aksion ken inisiatiba ket paset iti agtultuloy a pannakaipatungpal ti programa iti Solid Waste Management ti Gobierno Lokal ti ili a Cabugao, Ilocos Sur nga idauluan ni Mayor Josh Edward S. Cobangbang. # (Web In-Action )

No comments:

Post a Comment