Cabugao, Ilocos Sur – Naaramid ti panagtataripnong dagiti Punong Barangay iti pito a Coastal Barangay iti ili a Cabugao, Ilocos Sur iti sango ti Rizal Barangay Hall idi malem ti Setiembre 22, 2016 tapno awatenda dagiti maited kadakuada nga audible early warning system a naggapu iti Municipal Disaster Risk Reduction Management Council (MDRRMC) nga idauluan ni Mayor Josh Edward S. Cobangbang kas Chairperson.
Binayabay ni MDRRMC Officer Engr. Nestor B. Somera ni Mayor Josh Edward a nangiyallawat kadagiti nadakamat a ramit kadagiti Kapitanes nga isuda: Brgy. Captain Arnold “Bambi” V. Yangat ti Barangay Pug-os; Brgy. Captain Ronel Zamora ti Barangay Salapasap; Brgy. Captain Atilano Saquiton ti Barangay Sabang; Brgy. Captain Charlie Somejo ti Barangay Daclapan ken Opisiales a nangibagi iti tallo a coastal barangay.
Naikkan dagiti nasao a barangay iti saggaysa a hand operated siren idinto ta maaddaan met ti maysa a weatherproof warning siren (dakdakkel) ti MDRRMC.
Nakikaysa met ni ABC President Thaddeus U. Soller kadaytoy a pannakaited dagiti nadakamat a ramit kadagiti dadaulo ti coastal barangay ti ili.
Kinuna ni Engr. Somera a mausar dagitoy a warning device no adda mapasamak a didigra wenno kalamidad kadagitoy a nadakamat a barangay. # (Web In-Action)
No comments:
Post a Comment