Wednesday, September 21, 2016

PANAGDALUS ITI KALSADA-NASIONAL KEN PASILIDAD TI LGU, AGTULTULOY

Cabugao, Ilocos Sur – Naaramid ti Clean-up Drive dagiti Empleado ti LGU-Cabugao idi Setiembre 20, 2016 ket partikular a nagkonsentraran dagiti naglinis ket iti agsumbangir ti Kalsada Nasional iti Poblasion agingga idiay Barangay Sagayaden, Cabugao, Ilocos Sur. 

Daytoy a tignay ket pannakikaysa ti Munisipio  kadagiti Ahensia a kas iti DPHW District Maintenance Section ken iti Maintenance Crew ti Kyeryong J. D. Policarpio (JV) a mangmantener iti agtultuloy a kinadalus ti igid ti Manila Northroad.

Nupay kasta, tumultulong pay ti grupo ti Clean and Green Program  ti Munisipio nga agdalus kadagiti kalsada ti Poblasion nangruna kadagiti Processional Routes, Pasilidad ti Munisipio (Parke ken Plaza); Food Court; ken idiay Athletic Oval   tapno naan-anay ti pannakalinis ken pannakapapintas ti buya iti aglawlaw.

Kabayatanna, kangrunaan a maikkan ti mentenansia ti panagdalus ket iti Cabugao Central Park (CCP) a daydaywen ti umili ken bisita  iti aldaw ken sardam; idiay NISTC Public Market a paggatangan ti kaaduan iti kasapulanda ken idiay Cabugao Athletic Oval a kangrunaan a pakaang-angayan ti paay-ayam ti DepED kas iti Zone Meet; District Meet; ken iti Unit Meet.

Iti sabali a bangir, agtultuloy met a mamantener ti kinadalus ken sanitasion dagiti pasilidad nga usaren ti sapasap nga aggatang iti NISTC Public Market. Kanayon a madalusan dagiti Comfort Rooms (CRs) iti likud ken sango ti pasdek-NISTC Public Market  tapno adda madadaan nga usaren ti publiko kabayatan nga addada a gumatgatang iti Tiendaan.

Segun ken ni MENRO Edgar S. Balangatan, AT, agak-akem a dadaulo ti grupo a kalpasan a maiwakasda iti agsumbangir ti National Highway manipud iti Brgy. Sagayaden nga  agpatingga iti Brgy. Pug-os ket   nakikoordinarda pay kadagiti barangay ti Poblasion tapno tumulongda nga agdalus iti igid ti kalsada a mabatoganda.

Innayon ni MENRO Balangatan a monmonitorenda pay iti Cleanliness and Beautification dagiti pito a Coastal Barangays a kangrunaan a pagpasiaran  dagiti  Balikbayans/bisita babaen iti pannakikammayetda kadagiti Opisiales ti barangay kadagitoy a lugar. Tumulongda pay a mangpalinis iti agsumbangir a paset ti National Highway iti agpa-Port Salomague ken iti Provincial Road (Cuancabal-Nagsincaoan).

Dagitoy nga aksion ken inisiatiba ket paset iti Direktiba ni Mayor Josh Edward S. Cobangbang  iti agtultuloy a pannakaipakat ti panagdaldalus ken panangpapintas  iti aglawlaw ti ili a pagsayaatan ken pakairanudan met laeng iti sapasap. # (Web In-Action)

No comments:

Post a Comment