Tuesday, January 9, 2018

BRGY. ASSIGNMENT/BANNER PROGRAM TI DA-LGU, NAMANTENER

Cabugao, Ilocos Sur – Segun ken ni Municipal Agriculturist Robert S. Savella,  namantener ti Designasion, Banner Program, ken Barangay Assignment dagiti Office Regular Personnel iti Municipal Agriculture Office ti ili iti Tawen 2018.

Ni Mr. Nereo S. Daproza, AT,   iti baro ita a Municipal Fisheries Coordinator idinto ta ni Mr. Nathaniel B. Galamgam, AT, iti baro a Municipal Rice Program Coordinator.

Trabahuen met ni Ms. Arceli Antonette S. Racho, AT,  iti akem ti  Planning Report Officer ken MAFC Coordinator.

Iti biang met  dagiti asosasion dagiti mannalon ken mangngalap, napintas unay kadakuada daytoy a parupa ti serbisio nga itultuloy  ti nasao nga  opisina tapno maipamaysada a maammuan dagiti pakaseknanda a mannalon a   saanda a maitugot  iti papanda  iti opisinada gapu ta kasapulan met a maaktualanda  ti kasasaad dayta a pakaseknan iti barangayda.

Imbatad ti dadduma a Presidente ti asosasion a ditoy ita a mariknada ti kinaepektibo ti maysa a Teknisian a mangipatungpal iti programa iti Agrikultura agsipud ta kadakuada ket ti maysa nga “Extensionist” ket kasapulan a masansan a rummuar ken  makilangen kadagiti mannalon a makasapul iti pannarabayda.

Innayon pay dagiti mannalon ken mangngalap   nga epektibo dagiti mairubuat a programa ken proyekto ti DA-LGU a mangitag-ay ti kasasaad dagiti klienteda a mannalon ken mangngalap tapno mayagpang iti serbisio a kalikaguman  a tun-oyen ti Gobierno Munisipal nga idauluan ni Mayor Josh Edward S. Cobangbang para kadagiti umili. # (Web In-Action)

No comments:

Post a Comment