Cabugao, Ilocos Sur – Iti panangimaton ti Municipal Agriculture Office-LGU Cabugao iti sektor ti panagmulmula ket nangipaayda iti bukbukel kadagiti agmulmula ti nateng itay agtapos ti Tawen 2017.
Nupay kasta, saan a mapasamak ti panagkirang ti suplay ti nateng iti NISTC Public Market gapu ta adda latta maprodukto dagiti Off-Season Planters nangruna iti lugar a masasao a “Vegetable Bowl” ti ili nga isu ditoy ti Brgy. Salapasap a pakairamananen ti Barangay Bungro. Kasta pay kadagiti mailako a nateng nga aggapu iti kabangibang nga ili gapu iti inaldaw a tienda ditoy ili a Cabugao.
Nupay kasta, kuna ni Mr. Armando Azcueta, Presidente ti Cabugao Vegetable Growers and Traders Association a posible a naimula ti kaaduan kadagiti nadakamat a bukel tapno mapatuladanda dagiti kabarangayan-da nga agmulmula iti nateng.
Innayon ni Mr. Azcueta a kabayatan a maparegget ti backyard gardening ken panagmula ti nagduduma a natnateng iti taltalon kadagiti barangay ket itultuloy met dagiti kameng ti Asosasionda iti agmula ti hybrid a tarong, sili ken kamatis basta adda pagsibog uray no off-season type agingga iti bulan ti Marso ta adda latta masagsagana a paglakuanda babaen iti pannakaibiaheda idiay Cagayan, Manila ken Urdaneta a trade route ti natnateng. # (Web In-Action)
No comments:
Post a Comment