Thursday, January 18, 2018

CABUGAO MANGO PACKAGING CENTER, NAINAGORASIONAN

Cabugao, Ilocos Sur – Naaramid ti Blessing & Inauguration ti naipatakder  a Mango Packaging Center iti lote ti LGU-Cabugao iti Barangay Baclig, Cabugao, Ilocos Sur iti Enero 18, 2018.


Binayabay  ken kadua ni Mayor Josh Edward S. Cobangbang ni Board Member Atty. Ronnie R. Rapanut a nangibagi ken ni Governor Ryan Luis V. Singson a nanggetteng ti ribbon ken kangrunaan a nasangaili iti nasao nga inauguration ceremonies.

Naisaruno ti pannakaidaton ti Kararag babaen ken ni Rev. Fr.  Rex Rilveria iti imatang dagiti sangaili, Opisiales ti Barangay ken iti Ili ken kasta metten  dagiti kameng ti Cabugao Mango Farmers Multi-purpose Association ket kalpasanna   binendisionan ti Padi iti uneg a paset ti baro a pasdek.

Iti Programa, nag-Welcome  Remarks ni Vice Mayor DJ Savellano. Kimmablaaw ken nagyaman ti Opisial ket bininsana ti pateg iti pannakaipasdek ti proyekto a para iti pagsayaatan ti ili ken iti probinsia.

Nangited ti Mensahe ni Mayor Josh Edward S. Cobangbang. Kimmablaaw ken nagyaman iti amin a naitaripnong. Dinakamatna ti pateg a proyekto  babaen iti partnership ti Asosasion, LGU, Gobierno Probinsial ken iti Department of Agriculture (DA) babaen iti Regional Project Coordination Office ti PRDP. 


Innayon ti Ama ti ili a babaen iti agtultuloy a kammayet ken partisipasion dagiti maseknan kadaytoy a  proyekto a mangipromot ti  industria ti mangga iti lokalidad ket agtultuloy met iti progreso a sagrapen daytoy a sektor iti ili ken iti probinsia.

Nangipaay met ti Mensahena ni Former Mayor Edgardo “Ediboy” S. Cobangbang, Jr. Kimmablaaw ken nagyaman iti amin a timmabuno iti inagorasion. Binigbigna ti sirib ken  laing ti Opisiales ti  Asosasion iti Cabugao Mango Farmers Multi-purpose Association a nakairamanan metten ti ili iti pannakabenepisiar kadaytoy a proyekto nga impaay ti Wold Bank. Innayonna a nupay timmarabay ti LGU ket dagiti kangrunaan a nagited iti papeles ken pannakaiproseso ti kasapulan ket ammoda iti inar-aramidda ken matakderanda iti pannakabiangda a trabahuen tapno agballigi daytoy a proyekto. Dinakamat pay ti Pasado Mayor iti napalalo a panangapresiar dagiti umili iti proyekto ket bigbigenda unay a dagitoy ti supapak iti panangisakitda kadagiti pagsayaatan a maited para iti pagimbagan ti kaaduan.

Simmaganad ti panagsarita ni Ms. Sharon A. Viloria, I-SUPPORT Component Head. Kimmablaaw ken nagyaman ket bininsana ti pakasaritaan ken pakabuklan dagiti proyekto a naiteden iti Asosasion. 

Simmaganad ti Turnover ti Mango Packaging Center babaen iti Provincial Government nga ibagian ni Atty Ronnie R. Rapanut ken ti PRDP Regional Staff agraman dagiti Opisiales ti RPCO 1-PRDP iti Asosasion nga inimatangan dagiti Opisiales ti Ili nga idauluan ni Mayor Josh Edward S. Cobangbang.
Nangipaay ti Acceptance Speech ni Mrs. Faith Sabio, CMFMPA President.

Nangipaay met ti Mensahena ni DA Regional Technical Director Erlinda F. Manipon a nangibagi ken ni DA  Region 1 Executive Director Lucresio R. Alviar, CESO III. 

Inawat  ni Mayor Josh Edward S. Cobangbang ti Plake ti Pammigbig iti LGU-Cabugao iti nasayud a pannakairingpas ti pisikal ken pinansial a pakabuklan ti proyekto.

Naudi a nag-Mensahe ni  Provincial Agriculturist Mr. Constante B. Botacion ket kunana a nakapatpateg daytoy a nabangon a proyekto ta adu ti mabenepisiaran. 

Nakipaset dagiti Kapitanes ti barangay ti ili; dagiti kameng ti Konseho Munisipal nga isuda SBM Danny Q. Gazmen;  SBM Vicky S. Serna; SBM Dr. Jemaima S. Tan-Yee; SBM Josefina S. Vallejo; SBM Atty. Randy Baniaga G. Kinaud; SBM Jayhan Alcid-Tan; SBM Dodjie Santella;  ABC President Thaddeus U. Soller; MPDC/Budget Officer Florante S. Jara ken  dagiti Department Heads ti LGU-Cabugao ken iti DA-LGU Staff nga idauluan ni Municipal Agriculturist Roberts S. Savella. 
Nakikaysa met ni OPAG Provincial  Corn Coordinator Oscar Tobia. # (Web In-Action)

No comments:

Post a Comment