Cabugao, Ilocos Sur – Mairusrusat ti pannakadalus iti asideg ken mabatogan a parte ti NISTC Public Market iti National Highway babaen iti panangigannuat ti Cleaning Program ti Munisipio nga imatonan ni MENRO Edgar S. Balangatan, AT tapno naan-anay ti nadalus a buya ti aglawlaw kadagiti pasilidad ti LGU- Cabugao nga adda kadagitoy a disso.
Kabayatanna, makikoordinar ti pannakabagi ti MENRO iti Committee Chair on Environment iti Sangguniang Barangay ti Barangay Baclig a makasakup kadaytoy a pagrebbengan tapno tumulongda a mangdalus iti sirok ti rangtay ken agraman iti igid ti Karayan Cabugao.
Mangnamnama ni MENRO Balangatan a babaen iti nangatngato nga agpang ti koordinasion kadagiti barangay a makasakup kasta metten kadagiti establisimiento a masarakan iti malinisan a disso ket nadardarasda nga ipatungpal ti agtultuloy a panagdaldalus a pakaisagutan met ti sapasap iti napintas a buya ken sanitasion.
Dagitoy nga aksion ken inisiatiba ket paset iti Clean-up Drive ti Munisipio a mangmantener iti kinalinis ti aglawlaw a maysa a kangrunaan a programa ti LGU-Cabugao nga idauluan ni Mayor Josh Edward S. Cobangbang. # (Web Situational Report)
No comments:
Post a Comment