Cabugao, Ilocos Sur – Segun ken ni Ms. Jeannete Garcia, Municipal Nutrition Action Officer nga agtultuloy latta ti “Operation Timbang Program” kadagiti ubbing iti 33 a barangay ti ili a Cabugao, Ilocos Sur babaen kadagiti Barangay Nutrition Scholars (BNS) a tultulongan dagiti Barangay Health Workers (BHWs).
Innayonna a babaen itoy ket madeterminar ti pagdur-asan dagiti programa/aktibidad a maipatungpal iti pannakataraon, pannakataming ti salun-at ken panangsursuro kadagiti nagannak a mangtaripato iti pamiliada.
Innayon ni Ms. Garcia nga itantandudoda pay ti napintas a koordinasionda kadagiti Opisiales ti Barangay iti uneg ti barangay ken iti Purok.
Insupusop ni Ms. Garcia nga isuda nga adda iti Secretariat ti Municipal Nutrition Committee ket napintas ti koordinasion ken pannakikammayetda iti MSWDO, RHU, DepED ken iti LGU-Cabugao iti agtultuloy a pannakaipatungpal ti programa iti Nutrition Sector iti Munisipalidad.
Dagitoy nga aksion ken inisiatiba ket paset ti programa a panangpasayaat ti LGU-Cabugao nga idauluan ni Mayor Josh Edward S. Cobangbang iti serbisio ti nutrision nga itden ti Munisipio nangruna kadagiti agindeg iti away ken barangay tapno agtultuloy a mamantener ti napintas a salun-at iti sapasap. # (Web In-Action)
No comments:
Post a Comment