Tuesday, January 23, 2018

FISHERFOLK REGISTRATION, AGTULTULOY

Cabugao, Ilocos Sur – Maang-angay ti Fisherfolk Registration ditoy nga ili babaen kadagiti  pannakabagi ti Bureau of Fisheries and Aquatic Resources (BFAR) kadagiti mangngalap a kameng ti Pederasion iti pito a Coastal Barangay a kas iti Sabang, Dardarat, Salomague, Daclapan, Namruangan, Salapasap ken Pug-os.

Tartarabayen ida ni Mr. Nereo S. Daproza, Municipal Fisheries Coordinator ken ni Mr. Kyle Connelly, US Peace Corp Volunteer iti  pannakapirma dagiti standard form a maited kadagiti mangngalap.

Sakbayna, inlunsad ti BFAR-Ilocos Sur ti Boat Registry System (BoatR) tapno maestablisar iti Simplified and Standardized National Registration dagiti mangngalap, fishing gears ken dagiti fishing vessels.

Tapno maaramid daytoy, naikkan ti tunggal LGU iti gundaway a mangirehistro kadagiti masakupanda a mangngalap ken dagiti pagkalap tapno maaramid iti information online iti fisheries sector.

The BoatR ket agpaay a pagibasaran iti National Programs ti Aquaculture. Panggepna pay a lappedan iti llegal, unreported ken  unregulated fishing.  Sagudayen ti Republic Act 8550 or Fisheries Code of the Philippines, madusa ti asinoman nga agkalap nga agusar iti eksplosibo, panagkoriente ken panagsabidong wenno panagtuba ti ikan.

Iti biang ti indibidual a rehistrasion ti mangngalap, kasapulan a mairehistro dagiti husto nga agkalkalap tapno mairamanda kadagiti benepisio ken programa nga itden ti Ahensia ti BFAR ken ti LGU. 
Innayon ni Mr. Daproza nga agtultuloy ti updating ti masterlist dagiti mangngalap agingga inton 2020 agsipud ta no saan a rehistrado ti maysa a mangngalap ket saanna a maawat dagiti maipaay a pribilehio ken benepisio nga itden ti Ahensia, Gobierno-Lokal  ken iti Pederasion a nakaikappenganda.

Dagitoy nga aksion ken inisiatiba ket paset iti panangpatibker ti Munisipio ken iti Ahensia ti BFAR kadaytoy a Sektor tapno maikkan iti naan-anay a pannakaasikaso iti pakaseknan ken kasapulanda.  # (Web In-Action)

No comments:

Post a Comment