Tuesday, March 19, 2013

AGTULTULOY TI RHU NGA IPATEG TI SALUN-AT TI SAPASAP

Cabugao, Ilocos Sur – Ipasimudaag ita ti agtultuloy a kaadu ti umili a mapan agpaagas iti Cabugao Rural Health Unit maigapu iti naregget a pannakaipakat ti programa ti napintas a salun-at babaen ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Iti aldaw ti Lunes, Marso 18, 2013,  agpapada dagiti nataengan, agkabannuag, agtutubo, ubbing, maladaga ken masikog a mangbusat ti aldaw ti lawas a mapan agparikna iti salun-atda kadagiti nagaget a Doctor, Nurses ken Midwives a mangbukel ti Medical Force ti nasao nga RHU. Agtultultuloy latta a kasta   kadagiti sumarsaruno nga aldaw iti tunggal lawas maibasar iti Admission Section.

Ti pannakatagiben ti agtultuloy a salun-at dagiti umili ket prayoridad a programa ti Gobierno Munisipal nga idauluan ni Mayor Ediboy ken ni Vice Mayor Danny Q. Gazmen tapno naregta dagitoy  a mangannong iti pagrebbenganda iti bagida ken pamiliada a   makipagbangon iti nadurdur-as pay nga ili ti Cabugao. # (Web In-Action)

No comments:

Post a Comment