WATER HARVESTING PROJECT TI PHILRICE, ILUNSADDA DITOY CABUGAO

Cabugao, Ilocos Sur – Nag-Courtesy ti grupo ti Philrice-Batac ken DA-RFO 1, ILIARC iti Opisina ni Mayor Edgardo “Ediboy” S. Cobangbang, Jr. idi Marso 11, 2013 iti Opisina ti Municipal Chief Executive tapno ipakaammoda iti pannakairaman ti ili a Cabugao a Project Site ti Proyekto a napauluan ti  “Water Harvesting for Rice Intensification and Crop Diversification in Region 1”. Daytoy a proyekto ket idauluan ni Dr. Reynaldo C. Castro, Chief Science Research Specialist, Philrice Batac ket agbalin a joint project ti Philrice, DA-RFO 1 ken ti LGU a Collaborating Agency apaman a maaprobaran.

Manamnama nga agpaut ti proyekto iti 2 a tawen ket maikonsentrar kadagiti rainfed area ti maysa a lokalidad. Masirsirmata ti posibilidad a maigannuat daytoy a proyekto iti  narugianen ti DA a nakaiwayatan ti proyektoda para iti rainfed area  kas iti Barangay Bungro ken Barangay Pug-os.

Dagiti kangrunaan a panggep ti proyekto ket dagiti sumaganad:
1.Mangipanamnama iti pangalaan ti pagpadanum dagiti matalon/mabangkag  nga agpanpannuray ti tudo.

2.Maikonsentrar ti epektibo a pannakaipasdek ti water conserver (makali a pagurnongan ti danum).

3.Mairagpin iti proyekto ti panagtaraken ken pagpupokan ti ikan babaen iti kabaelan ti danum a mapataud.

4.Maisuro ti teknolohia iti panangsustener ken panangkonserbar iti agtultuloy a sustento a danum a  para iti maimula.

Iti pannaki-amad ti Web In-Action maipapan itoy, imbatad ni Mrs. Joenah G. Sevilleja, AT a nangkuyog kadagiti sangaili a sinuportaran  ni Mayor Ediboy iti pannakaipakat  daytoy a proyekto ditoy Cabugao. # (Web In-Action)