Monday, March 4, 2013

CABUGAO SK BASKETBALL TOURNAMENT, NALUKTAN

Cabugao, Ilocos Sur – Naluktan ti 2013 Cabugao SK Basketball Tournament babaen iti Parada a naaramid iti aglikmut ti Poblasion a nagparitisiparan dagiti Basketball Players ti nadumaduma a barangay, Coaches, Games Officials ken Marching Band ti Cabugao Institute ken Cabugao South Central School idi Marso 3, 2013 sa nagpatingga  iti Cabugao Cultural and Sports Complex, Brgy. Rizal, Cabugao, Ilocos Sur.

Iti Opening Program, indauluan ni SK Princess Monique Peria iti Invocation ken natokar ti Musika ti  Pambansang Awit ken Cabugao Hymn babaen ti Marching Band. Welcome Remarks ti binagi ni SK Federated President Benazir Sarmiento ket inawisna ti imatang dagiti umili a mangimatang kadaytoy kangrunaan a parang/pagteng  ti sports nga itandudo dagiti agtutubo iti barangay.


Imbasa ni Brgy. Bonifacio SK Chairman Arvin Jay Manauis ti Tournament Guidelines.


Kimmablaaw ken nagyaman ni Mayor Edgardo “Ediboy” S. Cobangbang, Jr. a naawis a nangipaay ti mensahe kadagiti agsasalip. Imbinsa ni Mayor Ediboy ti pateg ti partisipasion dagiti agtutubo iti pannakairubuat dagiti aktibidades a mangparagsak iti masungad a panagpiesta ti ili. 


Ingunamgunamna iti pannakamantener koma  ti sportsmanship ken napinpintas koma manen ti gapuanan dagiti agtutubo para itoy a torneo manipud iti kallabes a pasalip iti napan a tawen. Pinadayawan pay ti Alkalde Munisipal ti inisiatibo dagiti agtutubo kadagiti aktibidades nga ilunlunsadda a  mangpasayat iti sektorda a pakaidayawan met ti umili. 

Imbinsa met ni SK Efraim Mercado ti Oath of Sportsmanship. Kapasanna, naaramid ti Ceremonial Toss iti nagbaetan ti SK  Basketball Players ti Brgy. Margaay  ken ken Brgy.Turod-Patac babaen ken ni Mayor Ediboy nga inimatangan dagiti kaduana nga Opisiales ken iti sapasap a nagbuya iti uneg ti Complex.


Mangrugi ti SK Basketball Tournament manipud  iti Marso 3 agingga iti Mayo 10, 2013. Nakikaysa met iti Opening Program da SBM Benedict M. Savellano, SBM Josefina S. Vallejo, SBM Carlos V. Sison ken Brgy. Captain Inocencio S. Sadac ti Barangay Turod. Nag-Emcee ni Mr. Dario Roy A. Siruno, Municipal Information Officer. # (Web In-Action)


 
 

No comments:

Post a Comment