Immuna a naaramid ti seremonia ti pannakagetteng ti laso ti baro a pasdek ti Municipal Livestock Office babaen kada Diputado Ryan Luis V. Singson ken ni Mayor Edgardo “Ediboy” S. Cobangbang, Jr. nga inimatangan dagiti Opisiales ken kameng ti Cabugao Dayo, Opisiales ti Barangay, Opisiales ti Hunta Probinsial kas ken ni Board Member Jerry C. Singson, ken dagiti umili ti Cabugao.
Naisaganad ti programa. Linuktan ni Mr. Marciano Raciles, Jr., Presidente ti Cabugao Livestock Traders Association ket kimmablaaw ken inawisna ti sapasap iti Blessing ken Cutting of the Ribbon kadagiti baro a pasilidades ti Cabugao Dayo.
Agtultuloy a panagdur-as ti Cabugao Dayo babaen iti nakammayet a binnulig ti asosasion, Munisipio ken Gobierno Probinsial ti kaipapanan ti Mensahe ni Mayor Ediboy. Innayonna a gapu iti maipakpakita a napintas a pannakatarawidwid ti Dayo ket agtultuloy a maipaay dagiti mainayon a kasapulan a pasilidades ken suporta tapno naan-anay ti panagballigi ti Dayo iti masanguanan.
Dinayaw met ni Diputado Ryan ti naisangsangayan a liderato ni Mayor Ediboy iti pannakaidur-as ti agrikultura iti Munisipalidad partikular ti industria ti livestock. Kenkuana, ni Mayor Ediboy ti mabigbig a mangidaulo gapu ta no adda proyekto a maited ket mangted met ti counterpart wenno maitutop a pagrebbengan iti LGU ken ammo dagiti umili a bigbigen ti pateg dagitoy a proyekto ken mapadakkelda a maiserbi kadakuada iti pagsayaatanda.
Naikkan met ti gundaway a nagsarita da Bokal Jerry C. Singson, Hon. Constante Oandasan ken Cabugao Former Vice Mayor Atty Rex Augustus S. Morales maipapan iti panagballigi ti Cabugao Dayo.
Nangipaay met ti Mensahe ni Vice Governor Deogracias Victor B. Savellano, maibilang nga Ama ti Dayo. Dinayawna ti panagbinnulig ti LGU Cabugao ken ti Asosasion ti Livestock ta dua a tawen pay laeng ti napalabas ket adun ti nagdur-asan ti Dayo ken mangnamnama manen ti Bise Gobernador a manayonan pay dagitoy a nagdur-asan ti Cabugao Dayo iti masungad nga aldaw.
Inaramid ni Rev. Fr. Amy Cabaluna ti seremonia ti pammendision ket sinaggaysana a binendisionan dagiti nadakamat a pasilidades a binayabay da Diputado Ryan, Mayor Ediboy ken iti amin a naitallaong iti dayta a pasamak ti Dayo.
Kalpasanna, inawat dagiti Opisiales ti Cabugao Federated 4-H Club ti Ceremonial ti proyekto ti livestock iti Performance Challenge Fund for Agriculture nga inted ti LGU-Cabugao kadakuada babaen iti panangilungalong ni Mayor Ediboy kasta met ni SBM Benedict M. Savellano, Committee Chair on Agriculture. Inimatangan da Diputado Ryan ken Mayor Ediboy ken iti sapasap a naitallaong ti pannakaiparuk-at daytoy a proyekto dagiti agtutubo.
Simmaruno ti pakontes ti PINAKA ti Baka ken ti Nuang. Immuna a nagparada dagiti naikontes a baka sa iti nuang a riniendaan dagiti akintaraken. Dagiti mangabak ket mapadayawanto iti karabiyan ti Farmer’s and Fishery Day ti Cabugao Ragsak Festival 2013 inton Abril 22, 2013.
Kamaudiananna, naaramid ti Raffle Draw dagiti tiket a nailako ken insagana ti Asosasion. Inyalat ni Ms. Angel Addungay ti Brgy. Bonifacio, Cabugao, Ilocos Sur ti Umuna a Premio: papatan-ayen a Baka!
Iti Closing Program, pinagyamanan ni Mr. Dante Naval, Municipal Meat Inspector dagiti amin a nakipartisipar iti kaunaan a dakkel a taripnong a mapasamak iti pannakarambak ti Cabugao Ragsak Festival 2013 iti Cabugao Dayo kasta met dagiti nakipaggamulo iti naballigi a pannakaipatungpal iti nadakamat nga aktibidades.
Nakitaripnong met dagiti kameng ti Konseho Munisipal ti ili a Cabugao nga idauluan ni Vice Mayor Danny Q. Gazmen, Hon. DJ Savellano, ABC President, Brgy. Captain Teddy U. Soller ken bisita manipud iti nadumaduma nga Ahensia ken sektor ti kagimongan. # (Web In-Action)
No comments:
Post a Comment