Saturday, April 20, 2013

“KUBO NI MANNALON”, NANGRUGI A MAIDISPLEYDA ITI CCP

Cabugao, Ilocos Sur – Nangrugi iti Abril 18, 2013 iti pannakaidispley dagiti kubo ni mannalon a maluktan a  pagsasalipan dagiti Rehistrado nga asosasion  kadagiti 33 a barangays ti Munisipalidad ti Cabugao, Ilocos Sur.

Iti pannaki-amad ti Web In-Action iti Abril 18, 2013, naipakita ti  papeles a pagibasaran ti  MAO Evaluation Team nga idauluan ni Municipal Agriculturist Zenaida S. Andrada  a nakailanadan dagiti annuroten ti pakontes kas iti sumaganad:

1. Ti makikontes ket masapul a rehistrado nga asosasion.

2. Ti model miniature-size bahay kubo ket maidispley iti Cabugao Cultural Center, Brgy. Bonifacio, Cabugao, Ilocos Sur a  mangrugi iti Abril 18, 2013  agingga iti Abril 25, 2013.

3. Masapul a naaramid ti maisalip iti lokal a materiales (indigenous resources) ken aglanglanga a tipikal a pagtaengan ti mannalon.

4. No di masurot dagiti naituyang a pagannurotan ket maikkatan ti puntos ti naisalip.

5. Adda naituding a dimensions ken rukod ti pannakabukel ti maisalip a bahay kubo.

6. Ti maladaw a maidispley (aglabes ti Abril 18, 2013) ket maakseptar latta a ma-exhibit a mabuya ti publiko  ngem saanen  a mairaman a maikontes.

Dagitoy nga inisiatiba ken sirmata iti panangparambak ken panang-motibar kadagiti mannalon ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a manginspirar kadagiti mannalon nga agsaldet ken mangparagsak iti kailianda kadagiti maiduma a parang ken pabuyada iti kaaldawan ti  mannalon ken mangngalap iti 2013 Cabugao Ragsak Festival inton  Abril 22, 2013 ken kabayatan ti Fiesta Celebrations (Abril 22-25, 2013) iti ili a Cabugao, Ilocos Sur. # (Web Situational Report) 

No comments:

Post a Comment