Cabugao, Ilocos Sur – Iti pannaki-amad ti Web In-Action idi Abril 17, 2013, imbatad dagiti pumurok nga agindeg iti nagbedngan ti Brgy. Sagayaden ken Brgy. Refaro, San Juan, Ilocos Sur a manam-ayanda nga agallatiw iti kabangibangda a lugar gapu ta nasimpa ti pagdalananda manipud idi nasemento ti kalsadada iti Brgy. Sagayaden a komunektar iti bangir a barangay.
Impeksa ni Kagawad Elmer Castillo Sajonia ti Brgy. Sagayaden a pagyamananda unay kada Brgy. Captain Virgilio S. Piros ken ni Mayor Edgardo “Ediboy” S. Cobangbang, Jr. ta napatgan ti kalikagumda a pumurok a masemento ti dalanda.
Makatulong pay ti kalsadada iti panagiruarda ti produktoda ken mapadaras ti panagdaliasatda.
Dagitoy a pagnam-ayan ket resulta ti prayoridad a programa ti LGU-Cabugao a mangpasayaat kadagiti amin a kalsada iti barangay tapno agnam-ay dagiti mannalon ken iti sapasap nga agdaliasat. # (Web In-Action)
No comments:
Post a Comment