Cabugao, Ilocos Sur – Iti pannaki-amad ti Web In-Action idi Abril 15, 2013, imbatad ti Information Section ti Rural Health Unit ti LGU-Cabugao nga umabot ti 101 iti nailista a nagpakita/nagpaagas iti Balay-Pagagasan ti ili iti dayta nga aldaw.
Gapu iti sistematiko a pannakaurnos ti pila dagiti pasiente ket madagdagus a maasikasoda ken makaawidda iti barangayda nga awan ti pakataktakanda.
Innayon ni Mrs. Janet Sison, Public Health Nurse a gapu iti pannakakita dagiti umili ti pateg ti salun-at ken panangapresiarda ti pimmintas a serbisio ti RHU, masigud a daras dagiti rumsua a sagubanit ket maliklikan ti panagwarasna.
Dagiti inisitatiba a maipakpakat ket paset ti sirmata dagiti mangidadaulo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maikkan iti sapasap iti umisu ken naipanawen a serbisio ti salun-at. # (Web In-Action)
No comments:
Post a Comment