DUMURDUR-AS TI NISTC-CABUGAO PUBLIC MARKET

Cabugao, Ilocos Sur – Iti pannaki-amad ti Web In-Action iti NISTC Market Office iti Abril 2, 2013, imbatad  ni   Mrs. Norma Z. Bertumen, Market Supervisor III   nga agtultuloy a  pumintas ti koleksion kadagiti balanse dagiti  mangtartarawidwid  kadagiti puesto (Cazetas)  iti Tiendaan a naibasar daytoy iti rekord ti NISTC Office iti Enero-Marso 2013.

Nupay kasta, agtultuloy  ti umay makitienda uray pay kadagiti agindeg iti kabangibang nga ili nangruna kadagiti Holiday Season kas idi panawen ti Paskua ken kalkalpas a Semana Santa a mangpaadu ti malakuan dagiti aglaklako ken adda puestona iti Tiendaan.

Kanaig daytoy, dadduma pay a nagdur-asan ti Tiendaan ket iti maus-usaren a  baro  a Comfort Room iti daya ti NISTC Building kas katinnulong dagiti agdama a pagpaknian tapno mamantener ti kinadalus ken sanitasion iti uneg ti Tiendaan.

Dagitoy a  panagbalbaliw ken panagsayaat ti Tiendaan  ket gubuay iti nasamay a Direktiba ni Mayor Edgardo “Ediboy” S. Cobangbang, Jr. nga itultuloy nga ipatungpal  ti Management Staff  ti NISTC Public Market. # (Web In-Action)