Cabugao, Ilocos Sur – Naangay ti Awarding of the Revalidated Accreditation Program para iti LGU-Cabugao babaen iti panangipaay ti Civil Service Commission, Ilocos Sur Field Office a nagatendaran dagiti Department Heads iti Opisina ti LGU-Cabugao agraman dagiti kameng ti Sangguniang Bayan ti ili a Cabugao, Ilocos Sur.
Iti umuna a paset ti programa, impaay ni Ms. Flordeliza C. Bugtong, Senior Personnel Specialist, CSC Region 1 ti Overview of the CSC Accreditation Program; simmaganad ti Awarding of the Revalidated Accreditation Program babaen ti panangyawat ni Ms. Cecilia S. Bareng, OIC, CSC Ilocos Sur Field Office ken ni Mayor Edgardo S. Cobangbang, Jr. a binayabay ni Vice Mayor Deogracias Jose H. Savellano iti pakakitaan a maibilang ti LGU-Cabugao kadagiti 11 nga LGU’s ti Ilocos Sur a nakapasa iti pagrukodan a panangtungpal kadagiti pagannurotan ti CSC iti pakaseknan iti napintas a nagbanagan ti pannakataming ti pagsaadan dagiti empleado ken dadaulo ti opisina ti Gobierno Lokal.
Iti Acceptance Message ni Mayor Edgardo S. Cobangbang, Jr., dinakamatna nga iti pateg ti panagkakammayet dagiti opisina kasta met dagiti mangiturturong nga Opisiales ti Gobierno Lokal ti kangrunaan a makagapu a nagun-od ti Munisipio daytoy a pammadayaw ti CSC.
Nagyaman ti Local Chief Executive kadagiti simmangbay a dadaulo ti CSC ken agraman kadagiti amin a nagatendar daytoy a pannakabigbig ti Munisipio iti nagud-odna manen a pammadayaw.
Bininsa ni Ms. Bugtong ti Orientation on the Terms and Conditions of the Program nga agtultuloy nga annuroten ti LGU sakbay a maiwayatto manen iti kabiitan iti sabali nga evaluation.
Daytoy ket pagsagsaganaan iti maiwayat a pannakapili ti Best LGU iti pammadayaw a “Seal of Best Practices on Human Resource Management”, kangatuan a pammadayaw nga ited ti CSC iti naan-anay a panagtungpal ti LGU iti naannayas a pannakataming dagiti pagsaadan ti nadumaduma nga Opisina iti Gobierno Lokal. # (Web In-Action)
No comments:
Post a Comment