Cabugao, Ilocos Sur – Impakita dagiti mannalon nga agpatpatanor ti mais iti reggetda a makikaysa iti programa ti Probinsial ken Munisipal a Gobierno iti nadur-as a panagmula ti mais babaen ti ibibisitada iti Opisina ni Gov. Ryan Luis V. Singson dagiti pannakabagi ti Corn Farmers iti 13 a barangay ti ili a Cabugao, Ilocos Sur idi Nobiembre 6, 2013.
Ti nagan ti Hybrid Cornseeds ket LVN 10 a napatanor manipud idiay pagilian ti Vietnam ken 20 kilos ti per sack iti 18 bags a pamadasan dagiti mannalon ti Cabugao, Ilocos Sur ita a Main Crop 2013-2014 (Nobiembre-Mayo).
Imbatad ti kaaduan a nagatendar kadaytoy a papanda idiay Kapitolio Probinsial a naipadasen daytoy a klase ti mais a naimula iti 3 a barangay ti Sto. Domingo, Ilocos Sur ket immapitda ti 6-7 Tonelada ti kada ektaria.
Iti pannakaiyawat ti 18 Bags kadagiti Corn Farmers, mismo a ni Mayor Edgardo “Ediboy” S. Cobangbang, Jr. ti nangpasingked a maimula dagitoy a bukel ita a panagmumula ket inimatanganna ti pannakaiwaras dagitoy a bukel kadagiti mannalon iti sango ti Munisipio (Presidencia) idi Nobiembre 6, 2013. Binayabay dagiti pannakabagi ti DA-LGU ti Ama ti Ili kadayta a gundaway.
Ti naregget a programa ti panagmula ti mais ket kas pangannurot ti Agri-Pinoy Corn Program ti DA ken tapno manayonan ti panggedan dagiti mannalon gapu ta nasayaat met a pamataudan ti pagbiagan ti mais ken maikadua nga staple food ni Ilokano. # (Web In-Action)
No comments:
Post a Comment