Tuesday, November 5, 2013

GAP TRAINING, NAITED KADAGITI MANNALON TI CABUGAO

Cabugao, Ilocos Sur – Naaramid ti maysa nga aldaw a panagsanay dagiti mannalon ti lasona iti ili a Cabugao, Ilocos Sur idi Oktubre 31, 2013 iti Municipal Conference Hall Building.

Napauluan ti panagsanay iti Training of Shallot Farmers/Growers on Good Agricultural Practices (GAP) a nagkammayetan ti LGU-Cabugao nga idauluan ni Mayor Edgardo “Ediboy” S. Cobangbang, Jr., DA-Agriculture Training Institute (ATI), Ilocos Multipurpose Cooperative (IMPC) ken ti JM ‘s Agricultural Marketing , Inc.


Nasangaili ditoy a panagsanay ni Mayor Ediboy.  Kimmablaaw ken nagyaman ti Ama ti Ili iti pannakaited manen daytoy a gundaway kadagiti mannalon. Innayonna a masasao a “First Class Citizen” dagiti mannalon ta mayoridad nga umilida  ti Cabugao. No mapapintas ti kasasaadda ket isublida met laeng a progreso ti ili ta pumigsa ti “purchasing power-da” a gumatang ti tagilako a pangalaan ti Taripa ti LGU nga agsubli para iti umili babaen iti serbisio.

Naglektiur dagiti pannakabagi ti DA-ATI a da Dr. Melinda Mangabat, Ms. Cherry Paz Joaquin, Ms. Lovely Kieth Magayano, Mr. Arnel Felipe, Ms. Hazel Obien, Mr. Patrick Cacayuran, Mr. Jodene Mangabat, ken Mr. PJ Manalo.

Naadal ditoy ti kaipapanan ti Overview of the Training/Pre-test Values Re-orientation, GAP Compliance Requirements, Requirements of Foreign Shallot Buyers, Food Safety, Philippine National Standard: Code of GAP, Good Agricultural Practices on Onion, Cultural Management Practices, IPM-Insect Pests and Diseases And Their Control, Pesticide Management.


Nagsarita met ni SBM Benedicto  M. Savellano, Committee Chair on Agriculture ket dinakamatna ti pateg daytoy a panagsanay ket imdengan koma dagiti Farmer-Recipients.

Ti GAP Certificate ket maited kadagiti agsanay a mannalon a kas maibilang a pasaporteda  iti pannaka-avail-da ti napintas a marketing status  ti produktoda nangruna iti lasona iti agdama. # (Web In-Action)

No comments:

Post a Comment