Cabugao, Ilocos Sur – Iti pannakiuman ti Web In-Action ken ni Dr. Bernardino P. De Gracia, Municipal Health Officer, LGU-Cabugao idi Disiembre 11, 2014, impakaammona nga awan ti nadagsen a sakit a mapaspapasaran dagiti bumisbisita iti Rural Health Unit (RHU) iti inaldaw a papanda iti Balay-Pagagasan ta madagdagus a maaksionan ken maikkan ti agas dagiti adda sagubanitna a pasiente nga agpakonsulta.
Daytoy ket resulta ti napintas a pannakaipatungpal ti Kalusugan Pangkalahatan kadagiti 33 a Barangays ti ili a Cabugao a pappanan dagiti pannakabagi ti DOH a buklen dagiti aggapu iti MHO-RHU-RN-Heals, Municipal Operation Office ti 4 P’s, ken DSWD-MSWDO nga agtitinnulong a mangitandudo kadaytoy a Programa ti Gobierno Nasional ken Lokal a nangruna kadagiti aw-away.
Kabayatanna, natudingan ni Ms. Beverly Ramos, DOH Representative a nangited ti insentibo dagiti kameng ti Community Health Team (CHT) kadagiti 33 a barangays idi Disiembre 11, 2014. Segun kadagiti napagdamagan a BHW’s ken BNS ket dua a Quarter (innem a bulan) ti inawatda nga agdagup ti P3,000 ti pakabuklanna.
Dagitoy nga aksion ken inisiatiba ket resulta ti nakammayet a panagkinnoordinar dagiti maseknan nga Ahensia kas iti DOH ken ti LGU- Cabugao nga idauluan ni Mayor Edgardo “Ediboy” S. Cobangbang, Jr. iti pannakaipaay ti agtultuloy ken napintas a serbisio ti salun-at kadagiti umili a nangruna kadagiti agnanaed iti aw-away. # (Web In-Action)
No comments:
Post a Comment