Wednesday, December 17, 2014

INAUGURATION & BLESSING, EDUCATIONAL SERVICES CENTER (ESC)

Cabugao, Ilocos Sur – Nakagasgasat dagiti agad-adal ken mangisursuro iti Cabugao North Central School, Cabugao,  Ilocos Sur iti Disiembre 17, 2014 ta nabendisionan ken nainagoraran  ti baro a  pasdekda a napanaganan ti Educational Services Center (ESC) a tinalantanan dagiti opisiales ti Gobierno Minisipal nga idauluan ni Mayor Edgardo “Ediboy” S. Cobangbang, Jr.

Sakbay ti pammendision, nagsarita ni Mr. Armando Azcueta, PTA President ket kimmablaaw ken nagyaman iti naisagut iti pagadalan a pasdek a pagnam-ayan dagiti amin a nga agpabpabasa iti Cabugao North Central School ken kasta metten  dagiti mangisursuro ken ubbing.



Nangipaay met ti pangablaaw ken panagyaman ni SB Secretary Maxfel S. Suboc, dati a Presidente ti PTA a nakasakup pay laeng ti terminona iti pannakabangon ti nasao a pasdek.

Nagsarita ni SBM Dr. Jemaima S. Tan-Yee, Committee Chair on Education ket kimmablaaw ken nagyaman met iti agtultuloy a kammayet ken pammati dagiti nagannak ken mangisursuro iti LGU Cabugao a tumultulong iti pagadalan.

Ginetteng ni Mayor Ediboy a kaduana ni SBM Dr. Jemaima S. Tan-Yee, Committee Chair on Education ti laso a mangipalnaad ti pannakaisibro ti baro a pasdek-edukasion   nga inimatangan ti dagup ti populasion ti pageskuelaan, bumarangay ti Brgy. Rizal ken dagiti bisita iti dayta a panagtataripnong.

Nangipaay ti Mensahe ni Mayor Edgardo “Ediboy” S. Cobangbang, Jr. Kimmablaaw ken nagyaman iti amin a mangbukbukel iti   pageskuelaan ti Cabugao North Central School a kaaduan ti populasion a pageskuelaan ti ili a Cabugao.


Innayon ni Mayor Ediboy a saan a paudi ti North Central School ket saan nga agpatingga ti ayat ti LGU Cabugao a mangipaay ti tulong tapno iti masakbayan nga aldaw ket addanto manen tumanor a produktona nga agserbisio para iti ili ket daytoy a pasdek ket maisagut kadaytoy a henerasion ti ubbing. Insupusop ti Ama ti Ili  a makatulong ti pasdek iti pannakausarna a manghulma kadagiti agad-adal nga agbalin a naresponsable nga umili.

Pinagyamanan met ni Mrs. Estrellita M. Siruno, Principal II iti pageskuelaan iti adu a panagayat ti LGU-Cabugao nga idauluan ni Mayor Ediboy ta naisagutanda iti napintas a kabarbaro a pasdek. Innayonna a napintas a pagyanan dagiti ubbing nga agsissisip ti adal a manggun-od pay iti nangatngato nga agpang ti sirib.

Impeksa ni Mrs. Siruno ti nalaus a ragsak ken panagyamanna ta agtultuloy latta ti suporta ti Gobierno Munisipal ket nainggasatan ita nga aldaw ta mapasingkedanen  ti kaipapanan daytoy a baro a pasdek.

“Ni Apo Dios koma ti mangsupsupapak iti tulongyo ken kablaawankayo amin iti Naimbag a Paskua ken Nagasat a Baro a Tawentayo amin!” kinuna ti Prinsipal.


Naayaban iti entablado da Young Public Servant, Little Mayor Vince Carlo Saupan ken ni Little SB Chair on Sports and Social Services Chair Leonard Sevilleja ket nakidanggayda kadagiti Municipal Officials nga idauluan ni Mayor Ediboy agraman kadagiti mangisursuro nga idauluan met ni Mrs. Estrellita M. Siruno, Principal II  iti panagsindi ti iggemda a kandela.

Nangidaton ti Kararag ni Rev. Fr. Rigunay, Assistant Parish Priest, Cabugao Catholic Church sakbay a binendisionanna iti ruar ken uneg ti ESC Building. Timmarabay ti ragup nga idauluan ni Mayor Ediboy iti panagrikus ni Apo Padi iti uneg ken iti ngato ti Pasdek sada nagsubli iti entablado.

Kalpasan ti Blessing, naangay ti Parada dagiti amin nga agad-adal ti Cabugao North Central School, mangisursuro ken dagiti PTA Officers ket inunorda ti Processional Road ti Barangay Rizal sada nagtungpal iti Cabugao Cultural and Sports Complex Building.

Kalpasan ti Programa ken Blessing, naawis ti taripnong iti naisagana a napagsasanguan iti uneg ti pageskuelaan. 

Nakikaysa iti programa da SBM Danny Q. Gazmen; SBM Benedicto M. Savellano; SBM Vicky S. Serna; SBM Josefina S. Vallejo; SBM Jayhan Alcid Tan; ken ni SBM Atty. Bryann Jett S. Pano.  # (Web In-Action)

No comments:

Post a Comment