Cabugao, Ilocos Sur – Manmano nga agmintis ti pannakaitama ti apit iti 2nd Crop a mula a pagay dagiti mannalon ti Cabugao, Ilocos Sur a nakabuklan ti 200 ektaria a natalon, 340 a bilang ti mannalon ken 21 a barangay ti ili ti disso dagitoy a 2nd Crop (Nobiembre 2014 - Pebrero 2015).
Iti pannaki-amad ti Web In-Action idi Disiembre 10, 2014, imbatad ni Mr. Nerio S. Daproza, AT, Municipal Rice Program Coordinator a manmano nga agmintis ti 2nd Crop ta malaksid a paboran ti tiempo ket adda pay laeng ti danum a mausar nga aggapu iti puttotda iti Cabugao River nga usarenda a mangpatan-ay kadagiti mulada agingga iti bulan ti Pebrero a panagapitda.
Kabayatanna, makatulong met dagiti irrigation canals (Private, NIA-Communal ken NIS Canal) a naaramid babaen iti panangipatungpal ti Barangay, Gimong ti NIA-SIMABUSA, NIA-Gaco ken iti babaen ti agtultuloy a panangtarabay ti Gobierno Lokal ti ili a Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr. iti pannakapasayaat dagiti kanal a mamagkakamang kadagiti nalawa a sinilong iti pagtatalonan a maibilang iti Sitio Madula, Barangay Turod Patac.
Manamnama a no maapitan dagitoy a lokasion ti pagtatalonan ket mangnayon pay iti 1,284 metrika-tonelada a produksion iti mainayon iti kallabes a naapit itay Wet Season 2014 (Hunio-Nobiembre). # (Web In-Action)
No comments:
Post a Comment