NUTRITION SEMINAR TI INNA, MAIWAYWAYAT KADAGITI BRGYS.

Cabugao, Ilocos Sur – Madama a maipatpatungpal ita ti implementasion ti Infant and Young Child Feeding (IYCF) Program kadagiti 33 a barangay babaen kadagiti Barangay Nutrition Scholar (BNS) iti tunggal barangay. 

Segun ken ni Mrs. Joenah G. Sevilleja, Municipal Nutrition Action Officer ket aggraduar iti Disiembre 11, 2014 dagiti inna a nagsanay iti IYCF iti Barangay Quezon, Cabugao, Ilocos Sur ket sumarsarunonto ti eskediul dagiti dadduma a barangay.

Sakbayna, naballigi ti napasamak  a panagadal dagiti BNS, BHW’s, Mother-Leader ti 4 P’s ken Kagawad, Committee Chair on Health  iti 33 a barangays ti ili a Cabugao  iti naaramid a  5-days Re-echo of the Trainors Training  of Barangay Implementers on Promotion of Good Nutrition iti panagkammayet ti  LGU-Cabugao nga idauluan ni Mayor Edgardo “Ediboy” S. Cobangbang, Jr., National Nutrition Council-DOH   ken ti Ilocos Sur  Nutrition Council nga imbagian ni Mrs. Editha Castillo, Provincial Nutrition Officer   idi kallabes a Tawen 2013 iti Municipal Conference Hall, Cabugao, Ilocos Sur.

Iti  panagseminar,  kangrunaan a pagrikusan ti nayadal kadagiti trainees ket  iti umisu a panagpasuso ti maladaga, panangtaraon, panangasikaso no masakit ti ubing ken nayadal pay kadakuada ti sinaguday ti EO 51 (The Milk Code) a mangituding ti usaren a gatas a pagsuplementar  dagiti agpasuso nga inna.  Kasta met ti kinasagana ti salun-at ti ina tapno maipaay iti mayannatup  a pannaripato iti maladaga nga agdepende kenkuana ti pagbiagna/pannakaasikasona  kabayatan nga agtan-ay.

Naaramid pay ti actual demonstration iti maadal babaen kadagiti Trainors a BNS.

Napagnanamingan ken naigunamgunam kadagiti nagsanay iti suporta ti Komunidad ken no kasano a matignay/makigamulo  ti kaaduan a makikaysa kadagitoy a napapateg a gannuat para iti Infant and Young Child Feeding (IYCF) nangruna iti barangay.

Naisuro pay kadagiti Trainees  iti seminar iti panagusar ti IYCF Counselling Cards ken pannakabukel ti Re-entry Plans. 

Tinarabay ni Mrs. Joenah G. Sevilleja,  Municipal Nutrition Action Officer, dagiti BNS Trainors iti kada barangay. # (Web In-Action)