Cabugao, Ilocos Sur – Segun ken ni Mr. Warren Sumibcay, Mobile Teacher ti Alternative Learning System (ALS), Community Center, Brgy. Bonifacio, Cabugao, Ilocos Sur nga adda 28 a bilang ti Out-of-School-Youth (OSY) a nakaipasa iti Eksaminasion iti 51 a nageksamen itay nabiit iti ALS Equivalency Program ti DepED Cabugao District ita a Tawen 2015-2016 ket maawatda ti sertipiko nga ited ti DepED a nagturposda iti Elementaria ken Sekundaria.
Dagitoy nga Estudiante ket naggapuda iti nadumaduma a barangay ti ili a Cabugao, Ilocos Sur.
Innayon ni Mr. Sumibcay a babaen iti pannakaipadamag kadagiti amin a maseknan nga agtutubo iti amin a lugar ti ili ken kasta met iti itutulong dagiti Opisiales ti Barangay a mangduktal kadagiti non-schooler/drop-outs ken nagsardeng nga agadal maigapu iti nagkaadu a pakaseknan, manamnama a maibaonda nga agadal iti ALS tapno makaturposda iti adal.
Babaen iti agtultuloy a pannakaitandudo ti ALS Program ken iti adun a napagturpos ti DepED nanipud nangrugi idi Tawen 2004 ken agingga ita a Tawen 2016 ket nasaknapen a dumur-as daytoy a programa ti Edukasion iti ili a Cabugao, Ilocos Sur.
Insupusop ni Mr. Sumibcay a babaen iti itutulong pay dagiti nagannak ken agad-adal a kaduana a mangisaknap ti napintas a damag ket in-inut a makombinsir ti amin nga umili a di nagturpos iti elementaria ken high school a makipaset kadaytoy a napateg a programa tapno matun-oyan ti naan-anay a literacy rate kadagiti amin a barangay ken umili.
Iti agdama, insupusop ti ALS Mobile Teacher nga isagsaganaan ti 85 nga ALS Learners babaen iti naiget a panag-review-da para iti mapaspasangasangan nga eksamenda a pakaarisitan ti makaruar kadakuada iti School Year 2016-2017. # (Web In-Action)
No comments:
Post a Comment