Wednesday, August 3, 2016

WET SEASON 2016, AD-ADU TI BILANG TI EKTARIA A NAMULAANEN

Cabugao, Ilocos Sur – Segun ken ni Municipal Rice Program Coordinator  Nereo S. Daproza ti DA-LGU Cabugao   nga  adda 2,247 Ektaria a namulaanen a suksukayen ti umabot iti 3,200 a bilang ti mannalon ket addan 81 Porsiento iti pakadagupan  ti natalon iti amin nga Irrigated Area iti Munisipalidad.

Kabayatanna, ikagkagumaananda nga ammuen ti pagdurdur-asan ti  napamulaan ita a Wet Season 2016 (Hunio-Nobiembre) kadagiti sumaganad nga inaldaw nga aktibidadda:

1. Panagbisitana (as per schedule) kadagiti pagtatalonan kadagiti barangay ken  naestablisar a Demo-Farm ken nakaipatungpalan ti Gov. Ryan Rice Program 2016.

2. Pannakapatibker ti gimong dagiti mannalon babaen iti pannakadengngeg kadagiti pakaseknanda iti maangay nga aktual a panagbisitada  kadagiti pagtatalonanda.

3. Agtultuloy a pannakikammayet ti DA-LGU  kadagiti maseknan a line-agencies a mangprobitsar kadagiti serbisioda  tapno masungbatan ti pagkasapulan dagiti mannalon.

Innayon ti Rice Coordinator a babaen iti agtultuloy a panangtarabay ti DA-LGU Cabugao kadagiti mannalon,  manamnama a  mamantener ti kalawa ti mamulaan babaen iti inisiatibada  tapno  makaanay ti  suplay a padanum iti panagtan-ay dagiti naimulada a pagay. 

Dagitoy nga aksion ket maiyataday iti turongen  ti agdama a Programa para iti Sektor-Agrikultura iti kabarbaro nga Administrasion nga idauluan ni Mayor Josh Edward S. Cobangbang tapno masustener iti supisiente a paggapuan ti suplay a pagtaraon dagiti umili. # (Web Situational Report)

No comments:

Post a Comment