Cabugao, Ilocos Sur – Naaramid ti Turnover ti libre a a ganagan para kadagiti mannalon iti Barangay Cacadiran, Cabugao, Ilocos Sur ita nga aldaw, Agosto 8, 2016 ket naited dagiti ganagan iti Barangay Hall daytoy a masarakan iti Sitio Rebba a masakupan met laeng daytoy a barangay.
Indauluan ni Mayor Josh Edward S. Cobangbang dagiti naggapu iti Munisipio a pakaibilangan dagiti Staff ti DA-LGU Cabugao nga imatonan ni Acting Municipal Agriculturist Robert S. Savella a nangimatang iti pannakaiyawat kadagiti mannalon iti nadakamat a barangay nga idauluan da Brgy. Captain Charito Alex Siruno ken ni Cacadiran Farmers President Jimmy Seguban agraman dagiti Opisiales ti Barangay ken ti Asosasion.
Nagatendar met ni Municipal Rice Program Coordinator Nereo S. Daproza.
Iti Mensahe ni Mayor Josh Edward, kimmablaaw ken nagyaman ta matulongan met ti Munisipio dagiti mannalon nga agtultuloy a katinnarabay ti Gobierno Lokal a mangidur-as iti apit ti pagay tapno adda latta ti madadaan a suplay ti makan. Makomplementaran met dagitoy a sakripisioda babaen iti pannakaited ti libre a ganagan ken mainayon nga usarenda nga agpatan-ay iti nakalidad nga apit.
Kabayatanna, impeksa dagiti mannalon iti naan-anay a panagyamanda iti Gobierno Munisipal nga idauluan ni Mayor Josh Edward ken iti agtultuloy a panangtarabay kadakuada dagiti pannakabagi ti DA-LGU Cabugao.
Dagitoy a gannuat ket paset iti programa ti pannakaidur-as iti Benneg ti Agrikultura iti LGU-Cabugao nga idauluan ni Mayor Josh Edward S. Cobangbang tapno matulongan dagiti sapasap a mannalon iti inda manen panagpatan-ay ti pagay iti Wet Season 2016 (Hunio-Nobiembre) ditoy nga ili. # (Web In-Action)
No comments:
Post a Comment