Tuesday, August 16, 2016

TURNOVER TI GANAGAN ITI BRGY. QUEZON, NAGATENDAR NI MAYOR JOSH EDWARD

Cabugao, Ilocos Sur – Naaramid ti pannakaited  ti libre a ganagan para kadagiti mannalon iti Barangay Quezon, Cabugao, Ilocos Sur idi Agosto 12, 2016 ket naiyallawat  dagiti sako ti ganagan iti sango ti Barangay Hall daytoy  a nadakamat a barangay. 


Indauluan ni   Mayor Josh Edward S. Cobangbang dagiti naggapu iti Munisipio a pakaibilangan dagiti Staff ti DA-LGU Cabugao nga imatonan ni Acting Municipal Agriculturist Robert S. Savella  a nangimatang iti pannakaiyawat kadagiti mannalon iti nadakamat a barangay nga idauluan  ni Brgy. Captain Nida Somera Braceros iti Barangay Quezon ken nagatendar met dagiti Opisiales ti Barangay ken iti Asosasion ti mannalon. 

Iti Mensahe ni Mayor Josh Edward, kimmablaaw ken nagyaman iti kinatunos dagiti Opisiales ti Barangay ken Mannalon a mangpadaan kadagiti sumangpet a pagsayaatan iti barangay-da.

Kabayatanna, ti Barangay Quezon ti maysa a demo-area ti baro a teknolohia iti panagtalon a maawagan iti Farmers Field School (FFS)  a proyekto ti LGU-Cabugao ken ti DA-RFO 1 iti napalabas a tawen.

Kuna ni Mayor Josh Edward nga agyaman unay kadagiti maipakpakita a talek ken pammati dagiti amin a mannalon iti barangay iti Gobierno Munisipal ket agtultuloy daytoy a programa para iti pagsayaatan a maited kadakuada  ken manaynayonan tapno makomplementaran dagitoy  a kinaregtada  iti Sektor-Agrikultura. 


Kinomendaran pay ti Alkalde Munisipal iti regta dagiti mannalon a mangpatibker iti sektor-da nga agpataud ti pagtaraon iti sapasap ket kaikarianda latta ti maikkan iti pannarabay nga aggapu iti Gobierno Lokal. 

Kabayatanna, impeksa dagiti Opisiales ti Barangay ken dagiti mannalon iti Barangay Quezon iti  naan-anay a  panagyamanda iti Gobierno Munisipal nga idauluan ni Mayor Josh Edward S. Cobangbang   ken iti agtultuloy a panangtarabay-da   kadakuada  ken kasta metten dagiti pannakabagi ti DA-LGU Cabugao.

Daytoy a gannuat ket paset iti prayoridad a  programa iti pannakaidur-as ti Benneg ti Agrikultura iti LGU-Cabugao   nga idauluan ni Mayor Josh Edward S. Cobangbang tapno matulongan  dagiti sapasap a mannalon iti inda manen panagpatan-ay  iti nakalidad a  pagay  iti Wet Season 2016  (Hunio-Nobiembre). # (Web In-Action)

No comments:

Post a Comment