Cabugao, Ilocos Sur – Nupay makunkuna a “zdero dengue incidence” ti kaaduan a barangay ti ili ket agtultuloy latta ti Anti-Dengue Campaign ti LGU-Cabugao babaen iti panangiwardas dagiti Personnel ti Cabugao Municipal Health Office nga idauluan da Dr. Mark-Lawrence T. Tirao ken ni Public Sanitary Inspector Jeanette Garcia kadagitoy a bulan a matutudo.
Sakbayna, nayeskediul ti information drive-da kadagiti pageskuelaan-sekundaria iti ili a kas iti Lipit National High School; Sisim National High School; Pug-os National High School; ken ti Cabugao National High School (Turod) ket naipaganetget iti panagaramidda kadagiti aktibidad a mangprebentar iti panagraira daytoy a naranggas a sakit.
Nagitedda pay iti material a pangkontra iti dengue a kas iti O/L (Obcidal/Larvacidal) Trap.
Buklen ti nasao nga estratehia iti pananglaban ti dengue babaen iti panangadaptarda iti DOH 4s Kontra Dengue: Search and Destroy, Seek early consultation, Self-protective measures and Say no to indiscriminate fogging.
Panagdaldalus iti aglawlaw ken madalusan dagiti nasamek a disso iti arubayan ti posible a pagyanan ti lamok iti kaskenan pay a maaramid. Sumarsaruno ti defogging a mausar a pangkontra iti makadangran a lamok no kumaron ti situasion.
Dagitoy nga aksion ken inisiatiba ket gubuay iti nasamay a programa iti pananglapped ti nadakamat a sakit ita a panawen ti panagtutudo babaen iti panangitandudo ti Gobierno Munisipal nga idauluan ni Mayor Josh Edward S. Cobangbang tapno masalbar dagiti umili nangruna kadagiti ubbing iti pannakakagat iti agdangran a lamok. # (Web In-Action)
No comments:
Post a Comment