BARANGAY MARGAAY KEN BARANGAY ARAGAN, NAGSARUNO A NAIKKAN TI GANAGAN

Cabugao, Ilocos Sur – Nagsaruno a naaramid ti Turnover ti  libre a ganagan para kadagiti mannalon iti Barangay Marga-ay ken ti Barangay Aragan, Cabugao, Ilocos Sur idi Agosto 8, 2016 ket naited dagiti ganagan iti Barangay Hall dagitoy a barangay. 

BARANGAY MARGAAY

Indauluan ni Mayor Josh Edward S. Cobangbang dagiti naggapu iti Munisipio a pakaibilangan dagiti Staff ti DA-LGU Cabugao nga imatonan ni Acting Municipal Agriculturist Robert S. Savella a nangimatang iti pannakaiyawat kadagiti mannalon iti nadakamat a barangay nga idauluan da Brgy. Captain  Joseph P. Simbe ti Barangay Marga-ay ken ni Marga-ay Farmers President Wilson Discion agraman dagiti Opisiales ti Barangay ken ti Asosasion. 

Indauluan met ni Barangay Captain Modesto P.  Ronque ti Barangay Aragan dagiti kalugaranna a nangpasangbay kadagiti napan nagited iti libre a ganagan kadagiti mannalon iti lugarda.

Iti Mensahe ni Mayor Josh Edward, kimmablaaw ken nagyaman ket kunana a  rebbengna laeng nga agsubli kadagiti mannalon babaen iti porma ti serbisio ken tulong dagiti naiyambagda iti Gobierno Lokal.

Innayon ni Mayor Josh Edward nga agtultuloy daytoy a programa para iti pagsayaatan dagiti mannalon ken manaynayonan pay iti sumarsaruno a panawen.

BARANGAY ARAGAN

Insupusop ti Alkalde Munisipal iti pateg ti panangikaso dagiti pakaseknan dagiti mannalon gapu ta isuda iti agtultuloy a   katinnarabay  ti Gobierno Lokal a  mangidur-as iti apit ti pagay tapno adda latta ti madadaan a suplay ti makan. Makomplementaran met dagitoy a sakripisioda babaen iti pannakaited ti libre a ganagan ken mainayon nga usarenda nga agpatan-ay  iti nakalidad nga apit.

Kabayatanna, impeksa dagiti mannalon  iti dua a nadakamat a  barangay ken Asosasion  iti  naan-anay a  panagyamanda iti Gobierno Munisipal nga idauluan ni Mayor Josh Edward ken iti agtultuloy a panangtarabay  kadakuada  dagiti pannakabagi ti DA-LGU Cabugao.

Dagitoy a gannuat ket paset iti programa ti pannakaidur-as iti Benneg ti Agrikultura iti LGU-Cabugao   nga idauluan ni Mayor Josh Edward S. Cobangbang tapno matulongan  dagiti sapasap a mannalon iti inda manen panagpatan-ay  ti pagay  iti Wet Season 2016  (Hunio-Nobiembre) ditoy nga ili. # (Web In-Action)