Cabugao, Ilocos Sur – Naangay ti miting dagiti kameng ti Municipal Development Council (MDC) iti ili a Cabugao, Ilocos Sur iti Agosto 4, 2016 iti Cabugao Cultural and Sports Complex a nakabuklan dagiti nagatendar a Kapitanes ti Barangay, NGO’s kas iti Senior Citizen, Cabugao Vegetable Growers and Producers Association, Cabugao Livestock and Traders Association, Federated RIC, Federated BHWs kasta metten iti pannakabagi ti Cabugao DepEd, MLGOO ken dadduma a sektor.
Nag-Preside ditoy a miting ni Mayor Josh Edward S. Cobangbang ken timmulong da MPDC Florante Jara ken ni ABC President Thaddeus “Teddy” U. Soller.
Linuktan ni MPDC Florante Jara ti miting babaen iti panangibinsana ti akem ti MDC iti pannakaiplano dagiti mapunduan a proyekto ken aktibidades a pagsayaatan ti sapasap a Munisipalidad para iti Tawen 2016.
Naisaganad ti panangibinsa met ni ABC President Thaddeus “Teddy” U. Soller ti gapuanan ti LGU kadagiti naiprograma a proyekto iti Tawen 2015 ket kinatinnulongna dagiti Department Heads ken Staff ti Municipal Engineering nga idauluan ni Engr. Cresencio Marcos C. Formoso a nangilawlawag kadagiti nairingpas/maaramid a proyekto-impraestraktura. Impeksa met ti dadduma a Kapitanes dagiti proyekto a mainayon a maaramid iti barangayda. Naan-anay a nasungbatan dagiti problemada babaen iti panangited ni Mayor Josh Edward iti kapanunotanna maipapan kadagitoy a singasing.
Impaganetget ni Mayor Josh Edward S. Cobangbang ti panangparegta koma dagiti Barangay Officials iti Barangay Development Council (BDC) a kaduada a mangplano kadagiti kasapulan a pasilidad ken serbisio kadagiti kabarangayanda. Dagiti dadakkel a pakaseknan ket daytoy ti mairaman iti plano ti Munisipio nga ipatungpal a maipan iti Municipal Development Plan.
Nupay kasta, nagyaman ni Mayor Josh Edward iti naipakita dagiti Kapitanes ken NGOs a talek ken suporta iti kabarbaro nga administrasion a mangitultuloy a mangipatungpal kadagiti sumangbay ken ited a pagdur-asan ti Gobierno Munisipal kadagiti barangay ken iti sapasap nga umili.
Naikkan met ti gundaway dagiti pannakabagi ti tunggal sektor a nangyebkas iti pakaseknan ti itaktakderanda a hanay ken kasta met dagiti kalikagumda a mapatgan. Nai-notar amin dagiti napagnanamingan a plano ken proyekto a binukel ti MDC Members a mairaman iti Municipal Development Plan 2016. # (Web In-Action)
No comments:
Post a Comment