Cabugao, Ilocos Sur – Iti pannakiuman ti Web In-Action iti Agosto 22, 2016, impakaammo ti Opisina ti Municipal Operation’s Office (MOO) ti 4 P’s Program, Municipal Link-Cabugao nga itultuloyda nga isaksaknap ti pakabuklan ti programa iti Salun-at iti pagnaedan dagiti kameng ti 4 P’s kadagiti barangay ti Munisipalidad ti Cabugao iti bulan ti Agosto 2016.
Innayonda a makiko-koordinarda latta kadagiti Opisiales ti Barangay/Parent Leaders a katinnulongda a mangorganisar iti Family Development Session (FDS) para iti Topiko nga imitingda kadagiti 4 P’s para iti dayta a bulan nga agpokus iti Tema: “First 1000 Days ni baby pahalagahan para sa malusog na kinabukasan.”
Iti manon a bulan a pannakaangay ti Family Development Session (FDS) kadagiti barangay ket masursuro metten dagiti Parent-Leaders ti tumakder iti bukodda a panangtarawidwid iti miting ken seminar iti masakupanda.
Ita a bulan Agosto 2016, dagiti kameng ti Barangay Nutrition Scholars (BNS) ti ili a Cabugao ti aglektiur kadagiti FDS Session-da ket napagkaykaysaanda a maysa a Topiko latta ti binsaenda kadagiti Family Development Session-da tapno epektibo ti evaluation ken assessment a maisayangkat kalpasanna. Nalaklaka pay a maawatan dagiti adalanda a 4 P’s no dagitay kabisadoda/naipanawen a Topiko/Situasion iti maiyad-adal kas parte iti Values Formation ti Programa.
Kabayatanna, imbatad ni Miss Aida S. Cueto a kameng ti Municipal Operation’s Office (MOO) ti 4 Ps a madama ita a mangipatpatungpal iti Monitoring kadagiti dadduma a programa ti DSWD a ka-partnerna ti LGU-Cabugao nga idauluan ni Mayor Josh Edward S. Cobangbang. Dagiti sumaganad a programa a maipatpatungpal:
1. Sustainable Livelihood Program (SLP) – Naballigi ti Payao Project a naited kadagiti 4 Ps Beneficiaries iti Barangay Dardarat. 20 Porsiento ti dagup ti matgedanda iti maited a sagrapen dagiti kamengda; aglaklako metten dagiti naikkan ti taraken a burias a nagseminar iti Meat Processing iti SLP; nakastrek metten nga agtrabaho ti dadduma iti konstruksion dagiti 47 a nag-training ti Carpentry iti SLP itay nabiit. Segun ken ni Miss Juliet Madriaga, Social Welfare Assistant ti Cabugao a 44 ti bilangda a nagballigi iti TESDA Assessment ken maikkan iti NC II Certificate.
Dagitoy nga aksion ket maigapu iti agtultuloy a panangilungalong ti Gobierno Munisipal iti pannakikammayetna iti Ahensia ti DSWD babaen iti liderato ni Mayor Josh Edward S. Cobangbang iti napintas a maaramidan dagiti programa a maisaksaknap kadagiti barangay tapno maragpat iti sapasap a panagrang-ay iti Pamilia ken umili. # (Web In-Action)
No comments:
Post a Comment