Cabugao, Ilocos Sur – Naaramid ti Ceremonial Turnover iti Fertilizer Subsidy kadagiti mannalon iti Barangay Turod, Cabugao, Ilocos Sur a naggapu iti LGU-Cabugao idi Agosto 4, 2016 iti sango ti Barangay Hall iti nadakamat a barangay.
Daytoy ti pakauna iti Distribiusion ti Ganagan kadagiti 33 a barangay a paset ti programna ti LGU- Cabugao ita a Wet season 2016.
Buklen dagiti maited a ganagan iti maysa a bag a Triple 14 (Complete Fertilizer) ken maysa a bag a Urea iti tunggal Farmer ID Holder kadagiti agmulmula ti pagay idinto ta maysa met a bag ti 46-0-0 ken maysa a Urea kadagiti mannalon nga agmulmula ti Tabako a Birhinia iti masakupan ti 33 a barangay ti ili.
Iti Mensahe ni Mayor Josh Edward, kimmablaaw ken nagyaman ta adda manen maited kadagiti mannalon nga agtultuloy a mangidur-as iti rice self-sufficiency program ket makomplementaran ti reggetda a mangidur-as ti Sektor ti Agrikultura a buklen ti kaaduan a pagbiagan dagiti umili babaen iti pannakanayon ti puonanda nga agpatanor iti nakalidad nga apit.
Indauluan ni Mayor Josh Edward S. Cobangbang dagiti Opisiales Lokal ti ili a nangimatang iti pannakaiturn-over dagiti nasao a bag ti ganagan kadagiti mannalon iti nadakamat a barangay.
Timmarabay met ni Brgy. Captain Inocencio S. Sadac ken dagiti Opisiales ti Turod Farmer’s Association ket impeksada ti panagyamanda iti Gobierno Munisipal nga idauluan ni Mayor Josh Edward ken iti agtultuloy a panangasistir kadakuada dagiti pannakabagi ti DA-LGU Cabugao nga idauluan ni Acting Municipal Agriculturist Robert S. Savella.
Dagitoy a subsidized inputs ket paset ti programa iti pannakaidur-as ti Agrikultura iti LGU-Cabugao nga idauluan ni Mayor Josh Edward S. Cobangbang babaen iti pannakatulong dagiti sapasap a mannalon iti inda manen panagpatan-ay ti pagay iti Wet Season 2016 (Hunio-Nobiembre). # (Web In-Action)
No comments:
Post a Comment