Cabugao, Ilocos Sur – Naaramid ti pannakai-turnover ti libre a ganagan para kadagiti mannalon iti Barangay Rizal, Cabugao, Ilocos Sur iti Agosto 12, 2016 ket naiyallawat dagiti ganagan iti Barangay Hall daytoy a nadakamat a barangay.
Indauluan ni Mayor Josh Edward S. Cobangbang dagiti naggapu iti Munisipio a pakaibilangan dagiti Staff ti DA-LGU Cabugao nga imatonan ni Acting Municipal Agriculturist Robert S. Savella a nangimatang iti pannakaiyawat kadagiti mannalon iti nadakamat a barangay nga idauluan ni Brgy. Captain Thaddeus U. Soller, ABC President iti Barangay Rizal ken nagatendar met dagiti Opisiales ti Barangay ken iti Asosasion ti mannalon.
Iti Mensahe ni Mayor Josh Edward, kimmablaaw ken nagyaman ket kunana nga agtultuloy daytoy a programa para iti pagsayaatan dagiti mannalon ken manaynayonan pay iti sumarsaruno a panawen.
Innayon ti Alkalde Munisipal a makomplementaran iti regta dagiti mannalon a mangpatibker ti sektor-da nga agpataud ti pagtaraon iti sapasap ket kaikarianda ti maikkan iti pammadang nga aggapu iti Gobierno Lokal.
Kabayatanna, impeksa dagiti mannalon iti nadakamat a barangay ken Asosasion iti naan-anay a panagyamanda iti Gobierno Munisipal nga idauluan ni Mayor Josh Edward ken iti agtultuloy a panangtarabay kadakuada dagiti pannakabagi ti DA-LGU Cabugao.
Dagitoy a gannuat ket paset iti prayoridad a programa iti pannakaidur-as ti Benneg ti Agrikultura iti LGU-Cabugao nga idauluan ni Mayor Josh Edward S. Cobangbang tapno matulongan dagiti sapasap a mannalon iti inda manen panagpatan-ay ti nakalidad a pagay iti Wet Season 2016 (Hunio-Nobiembre). # (Web In-Action)
No comments:
Post a Comment