Cabugao, Ilocos Sur – Naileppas ti pannakaited dagiti libre a ganagan para kadagiti mannalon iti 33 a barangay iti ili a Cabugao, Ilocos Sur idi Agosto 18, 2016.
Indauluan ni Mayor Josh Edward S. Cobangbang dagiti naggapu iti Munisipio kasta metten dagiti Staff ti DA-LGU Cabugao nga imatonan ni Acting Municipal Agriculturist Robert S. Savella a nangimatang iti pannakaiyawat kadagiti mannalon kadagiti barangay a nagatendaran met dagiti Opisiales ti Barangay ken iti Asosasion ti mannalon.
Segun iti rekord ti DA-LGU, umabot iti 4,454 iti bilang dagiti mannalon a nawarasan iti 33 a barangay iti tallo a klase ti ganagan (2,909 ti bilang ti Bags iti Complete Fertilizer (14-14-14); 1,545 Bags ti 16-20-0; ken 4,454 Bags ti 46-0-0) a nakadagupan ti 8,908 Bags ti naited amin kadagiti mannalon.
Iti biang ni Mayor Josh Edward, nagyaman iti agtultuloy a kinatunos dagiti Opisiales ti Barangay ken Mannalon a nangpadaan kadagiti simmangpet a pagsayaatan iti barangay-da. Malaksid iti Fertilizer Distribution, naaramid pay dagiti pannakisarsarita ti Ama ti Ili kadagiti lumugar kadagiti barangay a napananda ket namrayan dagiti bumarangay a nangibuksil kadagiti dadduma pay a singasing ken pakaseknanda a mayataday met iti programa ti Mayor iti “Collaborating Policy” nga agtultuloy a pannakikammayetna kadagiti agindeg kadagiti barangay ti ili.
Kuna pay ni Mayor Josh Edward nga agyaman unay kadagiti maipakpakita a talek ken pammati dagiti amin a mannalon iti barangay iti Gobierno Munisipal ket agtultuloy daytoy a programa para iti pagsayaatan a maited kadakuada ken manaynayonan pay tapno makomplementaran dagitoy a kinaregtada iti Sektor-Agrikultura.
Daytoy a gannuat ket maysa kadagiti prayoridad a programa iti pannakaidur-as ti Benneg ti Agrikultura iti LGU-Cabugao nga idauluan ni Mayor Josh Edward S. Cobangbang tapno matulongan dagiti sapasap a mannalon iti inda manen panagpatan-ay iti nakalidad a pagay iti Wet Season 2016 (Hunio-Nobiembre). # (Web In-Action)
No comments:
Post a Comment