Cabugao, Ilocos Sur – Naangay ti Zone 3 Sports Competition Meet 2016 iti Cabugao Athletic Oval, Cabugao South Central School, Cabugao, Ilocos Sur iti Agosto 31, 2016.
Buklen ti Zone 3 dagiti pageskuelaan ti Nagsincaoan Elementary School; Lipit-Cuancabal E/S; Sagayaden E/S; Pila E/S ken TI Cabugao South Central School.
Immuna a naaramid ti Parada iti aglikmut ti Oval sa naisaruno ti Opening Program iti CSCS School Stage. Kalpasan ti Opening Prayer ni Mr. Rommel Santella, nakanta ti Philippine National Anthem ken ti Cabugao Hymn. Inakem ni Mr. Nick Bringas ti Opening Remarks.
Simmaruno ti Presentation of Delegates babaen kadagiti natudingan a Coaches iti tunggal pagadalan.
Nangted ti Mensahena ni Mayor Josh Edward S. Cobangbang. Kimmablaaw ken nagyaman ta napintas ti panagkakammayet dagiti pageskuelaan a mangipatungpal kadaytoy a tinawen nga aktibidad ti sports. Innayonna a kasapulan a napakumbaba ti maysa a grupo wenno pagadalan a mangabak kadaytoy a salisal kasta met laeng nga ammona koma ti mangawat iti pannakaabak dagiti di agballigi. Nupay kasta, “ You are all winners!” insupusop ti Ama ti Ili.
Impeksa ni Mayor Josh Edward ti ragsak ken pannakikaysana ta kunana a maysa met idi a Varsity Player idi agad-adal pay laeng ket kunana a daytoy ti kapintasan a “bonding” dagiti agtutubo ken ubbing ta mayadayoda iti bisio; adda ehersisioda iti pisikal ken mental a mangnayon ti panagtalekda iti kabaelanda ken ti bagbagida.
Nagsarita met ni SBM Atty. Bryan Jett S. Pano, Committee Chair on Youth and Sports. Dinakamatna ti pateg ti pannakaipamaysa dagiti sports events a mangnayon kadagiti umaayam a makipartisipar iti RIAA ken ti Palarong Pambansa. Innayonna a maipamaysa koma ti ay-ayam a Football ket inawisna ti amin nga interesado nga agkameng iti Cabugao Footboleros, maysa a pribado nga asosasion a pakasanayan dagiti agduyos kadaytoy nga ay-ayam tapno makaipatulod met dagiti pageskuelaan iti makisalip iti benneg ti rehional ken uray pay idiay Manila.
Naaramid pay ti Intermisssion Number ti CSCS Dance Club; Lighting of the Symbolic Torch ken Raising of the Zone III Flag.
Natudingan ni SBM Bryan Jett S. Pano a nangideklara ti pannakalukat ti paay-ayam. Impaay met ni Mayor Josh Edward ti Ceremonial Toss iti Football a binayabay ni SBM Jayhan Charisma Alcid-Tan.
Dagiti sports events a napartisiparan dagiti nakapilian dagiti atleta nga agsasalipto para iti District Meet ket iti Softball; Volleyball; Basketball; Football; Table Tennis; Chess; Athletics; Sipa Takraw; Lawn Tennis; Taekwondo ken Gymnastics.
Agpaay nga Officiating Officials dagiti mangisursuro/dadaulo kadagiti pagadalan a masakupan ti tunggal sona.
Ti Zone Meet ket naituding a pakaangayan a pangipakitaan ti kabaelan dagiti ubbing nga adda potensialna iti panagay-ayam iti nadumaduma nga sports events iti las-ud ti napagtitipon a pagadalan. Dagitoyto ti mangibagi iti maangay a District Meet iti Cabugao DepED ken iti nangatngato a tukad wenno agpang ti pagsasalipan dagiti agad-adal iti elementaria.
Kangrunaan a mangtartarawidwid kadagiti mapasamak nga sports activities iti Cabugao DepED ni Mr. Ronel M. Ubaldo, Head Teacher III, Salomague E/S ken agdama a District PESS Coordinator. # (Web In-Action)
No comments:
Post a Comment