ZONE 1 SPORTS COMPETITION 2016, NAANGAY ITI CABUGAO ATHLETIC OVAL

Cabugao, Ilocos Sur – Naangay ti Zone 1 Sports Competition  Meet 2016 iti Cabugao Athletic Sports Oval, Cabugao South Central School, Cabugao, Ilocos Sur idi Agosto 30, 2016.

Buklen ti Zone 1 dagiti pageskuelaan ti Pug-os Elementary School; Bungro E/S; Reppa-ac-Bato E/S; Salapasap E/S ken ti  Cabugao North Central School.

Immuna a naaramid ti Parada iti aglikmut ti Sports Oval sa naisaruno ti Opening Program iti CSCS School Stage. Kalpasan ti Opening Prayer ni Mrs. Imelda Esteban, T3, nakanta ti Philippine National Anthem, Region 1 Hymn, Ilocos Sur Hymn ken ti Cabugao Hymn. Inakem ni Mr. Francis de la Cruz, Zone 1 President ti Opening Remarks.

Simmaruno ti Presentation of Delegates babaen kadagiti Sports Coordinator a nangiyam-ammo iti tunggal pagadalan.

Nangted ti Mensahena ni Mayor Josh Edward S. Cobangbang. Kimmablaaw ken nagyaman ta natunos dagiti dadaulo dagiti pageskuelaan a mangipatungpal kadaytoy a tinawen nga aktibidad ti sports. Innayonna a kasapulan a napakumbaba koma ti maysa a grupo wenno pagadalan a mangabak kadaytoy a salisal kasta met laeng nga ammona koma met ti umawat iti pannakaabak dagiti di agballigi. Nupay kasta, “ You are all winners!” insupusop ti Ama ti Ili.

Impeksa ni Mayor Josh Edward ti ragsak ken pannakikaysana ta kunana a maysa met idi a Varsity Player idi agad-adal pay laeng ket kunana a daytoy ti kapintasan  a “bonding” dagiti agtutubo ken ubbing ta mayadayoda iti bisio; adda ehersisioda iti pisikal ken mental a mangnayon ti panagtalekda iti kabaelanda ken ti bagbagida.

Nagsarita met ni SBM Dr. Jemaima S. Tan-Yee, Committee Chair on Education. Dinakamatna ti pateg ti pannakaipromot  dagiti klase ti sports iti benneg ti pageskuelaan tapno makapatanorda met iti nakalidad a players kadagiti mapagsasalipan nga events iti tunggal benneg ti pasalip. 

Naaramid pay ti Intermission Number ti CNCS Gymnasts; Lighting of the Symbolic Torch dagiti RIAA Players 2015 ken  ti Raising of the Zone III  Flag.

Natudingan ni Mr. Ronel M. Ubaldo a nangideklara ti pannakalukat ti paay-ayam. 

Dagiti sports events a nakapilian dagiti atleta ket iti Softball; Volleyball; Basketball; Football; Table Tennis; Chess;  Athletics; Sipa Takraw; Lawn Tennis; Taekwondo ken Gymnastics.

Agpaay nga Officiating Officials dagiti mangisursuro/dadaulo  kadagiti pagadalan a masakupan ti nadakamat a sona.

Ti Zone Meet ket naituding a a pangipakitaan  ti kabaelan dagiti ubbing nga adda potensialna iti nadumaduma nga sports events iti las-ud ti napagtitipon a pagadalan. Dagitoyto  ti mangibagi iti maangay a District Meet iti Cabugao DepED ken iti nangatngato a tukad wenno agpang ti pagsasalipan dagiti agad-adal iti Elementaria.

Kangrunaan a mangtartarawidwid kadagiti mapasamak nga sports activities iti Cabugao DepED ni Mr. Ronel M. Ubaldo, Head Teacher III, Salomague E/S ken agdama a District PESS Coordinator.  # (Web In-Action)