Cabugao, Ilocos Sur - Bimmisita ni Provincial Veterinary Joey Warren Bragado ti Ilocos Sur iti kaaldawan ti Dayo (Sabado) idi Setiembre 22, 2012 ditoy Cabugao, Ilocos Sur.
Nabara ti panangsarabo ti Management ti Cabugao Dayo kasta met dagiti Opisiales ti LGU Cabugao iti Beterinario a nakaitaripnongan met ni Mayor Edgardo “Ediboy” S. Cobangbang, Jr. Imbinsa ni Mayor Ediboy ti napintas a pannakaiwardas ti Dayo ken dagiti sumaganad a mabangbangon a proyekto iti masasao nga “agricultural hub” ti Munisipio kas iti pannakaipatakder ti baro a pasdek ti Livestock Office, Cold Storage ti nateng, pannakaipasdekto ti trading post (bagsakan) ken ti plano a pannakatarimaan ti Slaughterhouse.
Iti panangipasiar da Vice Mayor Danny Q. Gazmen ken Municipal Meat Inspector ken ni Dr. Bragado iti Slaughterhouse, insingay ti Opisial-Probinsial dagiti pagsayaatan a maipatungpal no inkaso a mapabaro ti pagpartian.
Dinayaw ni Dr. Bragado ti programa ti Gobierno Munisipal nga idauluan ni Mayor Ediboy iti pannakaitandudo ti agrikultura ken livestock a maysa kadagiti tulbek a mamagdur-as ti ekonomia ti ili.
Kas iti sigud, nabun-as latta dagiti nai-dayo nga ayup ken naregget dagiti naaramid a transaksion a mangnayon ken mangitultuloy ti panagballigi ti kasasaad ti Dayo. # (Web In-Action)
No comments:
Post a Comment