MPDP PROJECT, NARUGIAN ITI LUSONG SUYO

Cabugao, Ilocos Sur – Nagun-od ti Baclig-Lusong Suyo (BACALL)  Multi-purpose Association nga idauluan ni Mr. Dominador Reynold Sabio ti dua a proyekto: Multipurpose Drying Pavement ken Flatbed Dryer manipud iti Department of Agriculture, Regional Field Unit 1, San Fernando City, La Union babaen ti tulong ti Gobierno Munisipal  nga idauluan ni Mayor Edgardo “Ediboy”  S. Cobangbang, Jr. ken DA-LGU nga imatonan ni Municipal Agriculturist  Zenaida S. Andrada.

Imbatad ni Mr. Sabio a narugianen a naback-fill lan ti darat ken graba  ti pakaidissuan dagitoy a pasilidades babaen ti panangtulong dagiti makinaria (dump truck ken loader) ti Munisipio idi Setiembre 14, 2012 ken naituloy idi Setiembre 15, 2012. Innayon ti Presidente nga imbaklay ti asosasionda ti pannakakrudo dagiti makinaria.

Malaksid kadagitoy a proyekto, nagun-od pay ti BACALL MPA ti Tresher ken Financial Assistance manipud iti LGU Cabugao ita a Tawen 2012.

Apaman a mairingpas  dagiti nadakamat a pasilidades ket manam-ayan dagiti mannalon iti pagibilaganda ken pagpamagaanda ti apitda nangruna no matutudo iti panawen a panagapitda. # (Web In-Action)