Friday, September 7, 2012

NANAM-AYEN TI DUMANON ITI BRGY. NAGSINCAOAN

Cabugao, Ilocos Sur – Nupay maysa a kasulinekan  a barangay ti Brgy. Nagsincaoan iti ili ti Cabugao, maysa a maipagpannakkel ti Konseho ti Barangay nga idauluan ni Brgy. Captain Philip Bringas ket ti sementado a dalan manipud Poblasion agingga iti Barangay Proper-da.

Agbinbinnulig ti Gobierno Munisipal ken Probinsial a mangmanmantener kadagitoy a dalan  tapno nadardaras a mairuarda ti produktoda ken panagdaliasatda nga agpaili no adda kasapulanda nga awan ti laslasatenda a karayan.


Ti sementado  a  dalan a lumabas  kadagiti naprogreso a lugar ti   Brgy. Cuancabal, Brgy. Lipit, Brgy. Cuantacla ken Brgy. Cacadiran a masungad no mapanka iti Brgy. Nagsincaoan ti kadakkelan a makagapu nga agnam-ay  ti lumugar ta mairamanda iti napintas a pagdalananda.


Iti pannakiuman ti Web In-Action iti Setiembre 6, 2012, imbatad ni Mr. Ronnie Bringas, Barangay Secretary ti Nagsincaoan ken  Presidente ti Liga ng mga Barangay Secretaries ti ili  a Cabugao a maysa pay a  sagudayda   ti napintas a panagtutunos ti lumugar ken  pannakilangenda kadagiti agdama a mangidaulo ti ili ken probinsia  a  mangibagnos kadakuada iti nasimbeng a panagbiagda nga agkakalugaran iti nasao a barangay. # (Web In-Action)

No comments:

Post a Comment