Cabugao, Ilocos Sur – Naaramid ti pananggetteng ti laso iti pannakaisibro ti baro a pasdek ti School Canteen ti Pug-os National High School, Brgy. Pug-os, Cabugao, Ilocos Sur babaen ken ni Mayor Edgardo “Ediboy” S. Cobangbang, Jr. iti Setiembre 27, 2012.
Binayabay dagiti naitaripnong ti Ama ti Ili a pakaibilangan da Mrs. Lilia S. Savella, Head Teacher II, SB Member Vicky S. Serna, Committee Chair on Education, SB Member Dr. Jemaima Tan-Yee ken Dr. Johan Yee-a kaingungotna; MPDC Florante Jara, Brgy. Captain Arnold Yangat, Ms. Dana Osborne, Miss Mildred M. Naval, Head Teacher III, Pug-os Elementary School, Mr. Edison Savellano, Head Teacher ti Arnap Elementary School ken Mr. Nestor de los Santos, ALS District Coordinator.
Nairugi ti programa babaen ti Food for thought for the day babaen ken ni Ms. Rea D. Samelin, School English Coordinator ken Welcome Remarks ni Mrs. Lilia S. Savella, Head Teacher II. Bugas ti bitla ni Mrs. Savella a maisaruno a kiddawenda ti pannakaipatakder ti Administration Building ti pagadalan iti Munisipio. Nangted ti namnama ni Mayor Ediboy para kadaytoy a kiddaw.
Kimmablaaw ken nagyaman ti Alkalde Municipal iti bumarangay ti Pug-os nga idauluan ni Brgy. Captain Arnold “Bambi” Yangat. Dinakamat ni Mayor Ediboy ti pannakalukat ti imatang ken apresiaren koma ti bumarangay ti pannakaadda/pannakapasayaat ti pagadalan-sekundaria ditoy a barangay a paka-hulma-an ti pampanunot dagiti agtutubo kas sumaruno a sanggir ti henerasion ken lideres iti ili a Cabugao. Dinakamat pay ni Mayor Ediboy nga adda naikumit ti LGU iti tunggal eskuela a pakatulongan iti sapasap ti sektor-edukasion.
Impeksa met ni SB Member Vicky S. Serna ti agtultuloy nga akemda a tumulong iti Ama ti Ili a mangipatungpal kadagiti pagsayaatan ti edukasion babaen kadagiti pandayenda a gakat iti Konseho Munisipal.
Kalpasan ti pannakagetteng ti laso, napagsasanguan ti naisagana a taraon para iti pangngaldaw a nakiragupan ti amin a nagatendar ti programa. # (Web In-Action)
No comments:
Post a Comment