Cabugao, Ilocos Sur – Manamnama nga agleppas iti Setiembre 21, 2012 ti panagrehistro dagiti napili a recipients ti Pantawid Pamilyang Pilipino Propgram (4 P’s) a programa ti Gobierno Nasional nga ipatungpal ti DSWD kadagiti LGU’s.
Iti Munisipalidad ti Cabugao, napatgan ti 1,143 a nababa ti kasasaadna a Pamilia nga aggapu iti 33 a barangay a mabenepisiaran kadaytoy a programa maibasar iti Surbey ken Census ti DSWD a nakalap idi Tawen 2009.
Iti uppat nga aldaw (Setiembre 18-21, 2012) a panagrehistro ti nadakamat a bilang ti Pamilia iti Cabugao Cultural Sports Complex, naregget a nagtitinnulong dagiti pannakabagi ti MSWDO Personnel nga idauluan ni MSWD Officer Lydia S. Gazmen ken Ms. Leonora G. Reintar, MSWDO Assistant, RHU Personnel, RN-Heals. Timmarabay met dagiti pannakabagi ti Sangguniang Bayan: SB Member Vicky S. Serna, Vice Chairman, Committee on Social Services, SB Member Dr. Carlito S. Pano, Chairman, Committee on Social Services ken SB Member Dr. Jemaima Tan-Yee, Member, Committee on Social Services nga isuda ti katulongan ni Mayor Ediboy a mangilunglungalong iti pannakaipasa kadagiti Gakat a mangpasayaat ti biag dagiti nababa ti kasasaadna nga umili. Nakikaysa met da Vice Mayor Danny Q. Gazmen, SB Member Benedicto M. Savellano ken SB Secretary Maxfel S. Suboc.
Iti maikapat nga aldaw ti Registration, nakitaripnong ni Mayor Edgardo "Ediboy" S. Cobangbang, Jr.kadagiti madama nga agrehistro iti Cabugao Cultural and Sports Complex ket dinayawna ti naannayas ken naballigi a pannakaaramid ti aktibidad.
Mapasingkedan ti kinatibker ti pannakaipakat daytoy a programa ti panagpirma dagiti recipients ti katulagan a mangipasigurado ti natallugod a panagtungpalda kadagiti pagannurotan kabayatan a sagrapenda daytoy a pagsayaatan. # (Web In-Action)
No comments:
Post a Comment