Cabugao, Ilocos Sur (Setiembre 3, 2012) – Ti Cabugao Community eCenter ket naipatakder iti 2nd Floor ti Municipal Hall ti ili a Cabugao babaen ti panagkammayet ti LGU nga idauluan ni Mayor Edgardo “Ediboy” S. Cobangbang, Jr. ken ti Philippine Community eCenter, maysa nga institusion nga agipasdek ti pasilidad ti komunikasion (computer shop) a maestablisar kadagiti LGU’s tapno masursuruan dagiti umili nangruna dagiti agnaed iti barangay a mangusar ti baro a teknolohia ti impormasion para iti pagsayaatanda ken iti komunidad-da.
Ti Cabugao Community eCenter ket pinatalgedan ti Konseho Munisipal ti pannakaakreditarna ken naituyang dagiti annuroten ti pannakausar ken kanaigna a pagrebbengan iti panangusar ti publiko iti siled dagiti ramit a computer.
Iti launching program, pinagyamanan ni Mayor Ediboy dagiti pannakabagi ti Community eCenter a nangipakat ti kastoy a programada iti ili a Cabugao babaen ti pannakinaming dagiti kameng ti MPDC a napusgan a nagsanay maipapan itoy sakbay a maipatungpal ti pakabuklan ti programa.
Pinagyamanan pay ti Alkalde Munisipal ti regget dagiti timmabuno a pannakabagi ti nadumaduma nga ahensia ken opisina kas iti DepEd, Cabugao Senior Citizen, BFP, MPDC, SB, NGO, Cabugao SK Federation ken bisita iti pannakailunsad ti nasao a proyekto ditoy Munisipio.
Katinnulong ti Munisipio dagiti opisiales ti Cabugao SK Federated Association a mangidur-as/mangmantener kadaytoy a proyekto. Imbaga ni Mayor Ediboy a mairaman pay a makipagusar kadaytoy a pasilidad ti impormasion dagiti estudiante ti Alternative Learning System (ALS) tapno masursuruan dagiti agtutubo iti kabaruanan a teknolohia ti impormasion.
Kangrunaan a panggep daytoy a computer shop ket pagadalan dagiti interesado a makasursuro nga agusar iti kabaruanan a wagas ti impormasion ken komunikasion nangruna iti computer. Maiwayat dagiti seminar-workshop babaen ti MPDC a makatulong pay iti pannakaidur-as daytoy a programa iti Munisipio para iti sapasap.
Nakitaripnong dagiti kameng ti Sangguniang Bayan kas kada SB Member Vicky S. Serna, SBM Josefina S. Vallejo, SBM Dr. Carlito S. Pano, SBM Benedict M. Savellano, SBM (Ex-Officio) Benazir Sarmiento, SB Secretary Maxfel S. Suboc, Municipal Treasurer Lourdes Azcueta, MPDC Florante Jara, Principal Felipa B. Asuncion ti Cabugao NHS, Head Teacher Lilia Serrano ken Rosemelinda Baclig ti Pug-os NHS ken Sisim NHS kas panagsaganadda ken empleado ti LGU.
Nakikaysa met da dati a Provincial SK Federated President DJ Savellano, Brgy. Captain Arnold Yangat, Ms. Dana M. Osborne ti University of Arizona, USA, Ex-SB Member Carlos Sison, ken Mr. Thomas S. Alcantara, Regional IT Coordinator/Facilitator manipud iti Philippine Community eCenter iti nasao a launching program. # (Web In-Action)
No comments:
Post a Comment