Cabugao, Ilocos Sur - Naited ti pension dagiti kameng ti Senior Citizen iti ili a Cabugao idi Setiembre 13, 2012. Umawat ti tunggal recipient ti gatad a P1,5000 (Hulio-Setiembre) ti 3rd Quarter 2012 babaen ti DSWD-Municipal Social Welfare and Development nga imatonan ni Mrs. Lydia S. Gazmen, Municipal Social Welfare Development Officer.
Nasapa a dimteng dagiti nataengan a naggapu iti nadumaduma a barangay ti ili. Umuna nga ipakitada ti ID ken maikkanda ti numero a pagibasaran ti para-ited ti gatad. Dagiti mangirepresentar ti di nakaumay a recipient ket ipakitada ti authorization letter ken valid ID-da a maseknan a mangawat ti pension.
Iti pannakiuman ti Web In-Action kadagiti nataengan, imbatad ni Mrs. Luzviminda Solar ti Brgy. Marga-ay nga agyamanda unay iti agtultuloy a panangisakit ti Munisipio iti pagkasapulanda. Innayonna a mariknada ti importansiada a kas maysa a dasig ti kagimongan iti Munisipalidad.
“Agyamankami, Apo, ta uray kaskasano ket makatulong ti dakkel daytoy a maited nangruna ita ta kakrisis. Agyamankami ken ni Kapitanmi ken nangruna ni Apo Mayor kasta met kadagiti opisiales ti Munisipio,” insupusop met ni Mr. Reynaldo Suboc, taga-Brgy. Maradodon, Cabugao, Ilocos Sur.
Nagatendar ti nasao a taripnong ni SB Member Dr. Carlito S. Pano, Chairman, Committee on Health and Social Services ti Sangguniang Bayan ken SB Member Vicky S. Serna, Chairman, Committee On Education agraman dagiti pannakabagi ti Opisina ti MSWDO a timmulong a nagasikaso kadagiti nataengan.Ti agtultuloy a pannakatulong ti sektor dagiti nataengan ket prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment