YEAR-END CONFERENCE TI DA-BFAR, NAANGAY DITOY CABUGAO

Cabugao, Ilocos Sur – Naangay ti Year-End Conference ti Department of Agriculture-Bureau of Fisheries and Aquatic Resources (BFAR) sadiay Dardarat Cove and Fish Sanctuary, Brgy. Dardarat, Cabugao, Ilocos Sur idi Disiembre 13, 2012 a nagpartisiparan dagiti delegado iti nadumaduma a Coastal Municipalities ti Ilocos Sur ken Opisiales ti DA ken BFAR iti Provincial ken Rehional a benneg.

Nasapa a nagsangpet ti dadduma a delegado. Naaramid ti panagreport ti nagapuanan ken pakaseknan ti tunggal ili/siudad  babaen ti panangiturong ni Mr. Elmor C. Bugaoan, Provincial Fishery Officer iti salinong ti Cottage.

Apaman a nakasangpet ti kaaduan a delegado, nairugi ti programa a pangparagsak payen  ti panagtitipon iti benneg ti Fisheries ita a panawen ti Paskua.

Kalpasan ti Invocation nga inannong  ni Mrs. Charito Sonido, Sinait Fishery Coordinator, impeksa ni Brgy. Captain Danny Garcia ti napnuan panagyamanna ken   nabara a pammasangbayna  kadagiti amin a timmabuno.

Inulit ni Provincial Agriculturist Teofilo R. Quintal a nawaya pay laeng dagiti mannalon ken mangngalap nga aggun-od iti Farm Mechanization and Post-harvest Facilities Program ti DA ta agpatingga iti Tawen 2016. Kasapulan, kunana, a gundawayanda ita daytoy a programa ket dinayawna ti ili a Cabugao a nakaadun dagiti mannalon ken mangngalap a nakagun-od ti makinaria, ramit  ken pasilidades gapu iti dakkel a suporta ken pannarabay ti LGU nga idauluan ni Mayor Edgardo “Ediboy” S. Cobangbang, Jr.

Kimmablaaw ken impeksa met ni Mayor Ediboy ti  ragsak ken panagyamanna iti amin a naitaripnong. Pinagyamananna ta iti napintas a panagkibin dagiti mannalon/fisherfolks ken ti LGU, naragsak met ken nadur-as ti kasasaad dagitoy  nga aggigimong. Pinagyamanan pay ti Ama ti Ili iti indanon ti Ahensia ti DA a proyekto a maisagut iti ili a Cabugao  manipud  ken ni Congressman Ryan Luis V. Singson, First District, Ilocos Sur.

Impeksa met ni Mr. Rogelio Ragonjan, Regional  Fishery Coordinator iti panagyamanna iti napintas a panangsabat ti LGU-Cabugao ken iti Fishery Sector-na kadagiti programa a makatulong kadakuada kasta met iti nabara a panangsangaili ti LGU ken ti Barangay  kadakuada iti amin nga aktibidades ti Fisheries ditoy Barangay Dardarat.

Napagsasanguan  ti amin a nagatendar iti naisagana a taraon iti pangaldaw kalpasan ti programa.

Dimteng  met ti grupo ni Assistant Regional Director Rosario Segundina  P.  Gaerlan ket nagsasaritaanda kada Mayor Ediboy, Mr. Elmer  C. Bugaoan, Mr. Rogelio Ragonjan, Brgy. Captain Danny Garcia dagiti dadduma pay a pakaseknan dagiti mangngalap ditoy Cabugao.

Nakikaysa met iti panagtitipon da Vice Mayor Danny Q. Gazmen, ABC President Brgy. Captain Teddy U. Soller,  SB Member Benedict M. Savellano, SB Member Carlos V. Sison,  Hon. DJ Savelllano ken Brgy. Captain Robertson Gorospe.

Tampok iti Year-End Conference ti pakabuklan dagiti napagnanamingan kas  iti pannakabukel dagiti fish sanctuaries, panangtiped ti illegal fishing ken maikkan ti livelihood assistance dagiti mangngalap, mangrove planting ken dadduma pay a proyekto, aktibidades,  adal   a makatulong kadagiti fisherfolks iti amin a Coastal Municipalities babaen ti tulong ken pannarabay ti LGU’s ken DA-BFAR. # (Web In-Action)