MASSIVE REFORESTATION PROJECTS TI LGU, NABALLIGI

Cabugao, Ilocos Sur – Umabot ti 27 a barangays nga adda maitutop  a pagmulaan ti seedlings ti nagpartisipar iti nasaknap a panagmula iti kayo ita a Tawen 2012.

Iti pannaki-amad ti Web In-Action iti Disiembre 19, 2012, imbatad ni MENRO Edgar S. Balangatan nga umabot ti 78,000 nga assorted tree  species ti naimula a kayo kadagiti disso a naituding a nakaimulaanda ken inggudua ti nagbiag maibasar iti survivability rate nga inyusuat ti pannakabagi ti Tanim Kalikasan, Inc. ken isuna.

Innayon ni MENRO Balangatan a nagtinnulongan pay  ti NGO-Tanim Kalikasan, Inc. ken ti Municipal Plant and Nursery a sinuportaran dagiti pagkasapulan a seedlings a naimula.

Kanaig daytoy, impalgak ni MENRO Balangatan a maar-aramid ti koordinasion ti Opisinana iti DENR ken  Opisiales ti barangay iti pannakaipakat ti pagannurotan ti Anti-carabao logging activities nangruna kadagiti watershed area  ti Munisipalidad tapno masustener ti pannakaisubli ti forest cover dagiti bantay kasta met iti panakasukat dagiti mapukpukan a pinuon  a mausar iti pannakaluto  iti bulong ti  birhinia a tabako dagiti mannalon.

Dagitoy nga addang ket kanaig   ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a panangsalaknib ti aglawlaw babaen ti panagmula ti kayo ken panangprotektar kadagiti nabatbati a pinuon ti kayo kadagiti watershed area ken kabambantayan ti Munisipalidad. # (Web Situational Report)