Cabugao, Ilocos Sur – Mismo
a ni Mayor Edgardo “Ediboy” S. Cobangbang, Jr. ti nangted ti instruksion
kadagiti kameng ti Municipal Disaster Risk Reduction Management Council
(MDRRMC) ti LGU-Cabugao idi karabiyan ti
Disiembre 8, 2012 a yaagibas ti Bagyo Pablo iti kabaybayan ti Baybay Tsina nga
asideg ti ili a Cabugao, Ilocos Sur. Nagsagana dagiti kameng ti MDRRMC agingga
iti bigat ti Disiembre 9, 2012 a manamnama a pannakaibaba ti pagsignalan ti Numero
2 ti bagyo.
Indauluan da Engr.
Nestor Somera ken Engr. Cresencio C. Formoso dagiti kameng ti MDRRMC a nag-base
iti pasdek ti Munisipio agraman ti pannakaisagana dagiti lugan a mausar kas iti
dua nga ambulansia ken back hoe ket naiparadada iti sango ti Munisipio tapno masindadaan a
mausarda no dumegdeg ti kalamidad.
Kabayatan ti panangmonitorda
babaen iti ramit-komunikasion kadagiti kameng ti BDRRMC kadagiti barangays
nangruna kadagiti disso ti landslides ken malaylayus no kasta a dumteng ti bagyo,
nagturong met ti tropa ti Municipal Police Station-Cabugao a nagpakaammo/nagmonitor kadagiti Coastal Barangays para iti panagsaganada
no adda Tsunami.
Daytoy a tignay ket
napateg a gay-at ti MDRRMC-Cabugao nga
aramidenda kas panagsagana iti isusungad
ti didigra tapno
maalay-ayan/masalakniban dagiti umili nangruna kadagiti agnanaed kadagiti
napeggad a disso iti panawen ti kalamidad. # (Web Situational Report)
No comments:
Post a Comment